Paglaganap ng pekeng gamot, naharang ng FDA
NASABAT ng Food and Drug Administration (FDA) kamakailan ang kahon-kahong mga pekeng gamot sa isang entrapment operation, sa pangunguna ni Director General Nela Charade G. Puno, at ng PNP-Criminal Investigation and Detection Group (CIDG).
Karamihan sa mga pekeng gamot ay mga kilalang over-the-counter medicines na ginagamit sa mga pangkaraniwang sakit gaya ng ubo, sipon, lagnat at sakit ng katawan.
Pinuri ng Unilab, Inc., nangunguna at kilalang kumpanya ng gamot sa bansa, ang matagumpay na pagsisikap ng FDA at CIDG para mapangalagaan ang kalusugan ng mga mamamayan.
“Binabati namin ang Food and Drug Administration ( FDA), sa pangunguna ni Director General Nela Charade G. Puno, at ang CIDG sa matagumpay nitong entrapment operation ng mga pekeng gamot. Kami ay nakahandang makipagtulungan sa kanila upang masigurong may mananagot sa pagpapalaganap ng mga nasabing pekeng gamot,” saad sa pahayag ng Unilab, Inc.
Patuloy na nakikipag-ugnayan ang Unilab sa iba’t ibang ahensiya ng gobyerno upang masugpo ang pagkalat ng mga pekeng gamot. Nakahanda ang kumpanya, katuwang ang FDA at ang PNP-CIDG, na maghain ng kasong kriminal sa sinumang mapapatunayang lumalabag sa Republic Act 8203 o Special Law on Counterfeit Drugs.
Payo ng Unilab sa publiko, maging mapanuri at bumili lamang sa mga kilala at pinagkakatiwalaang botika at magsumbong sa mga awtoridad kung may nabiling kahinahinalang mga gamot.