POLICE DEPUTY SAPUL SA ULO 4
Napatay ng nanlabang ‘tulak’
Nasawi ang deputy chief ng Cainta Municipal Police nang mabaril sa ulo ng isang umano’y kilabot na drug pusher na sinasabing nakabakbakan ng mga awtoridad sa Barangay Floodway, sa Cainta, Rizal, nitong Linggo ng gabi.
Hindi na umabot nang buhay sa Pasig City General Hospital si Senior Insp. Jimmy Senosin, 41, deputy chief of police ng Cainta Police, sanhi ng tinamong tama ng bala sa ulo.
Nagsasagawa ng manhunt operation ang pulisya laban sa itinuturong suspek na si alyas “Ruben Tae”, nasa hustong gulang, at tagaWestbank Road, Bgy. San Andres, Cainta.
Sa ulat na ipinarating ng Rizal Police Provincial Office (RPPO), dakong 7:00 ng gabi nang makatanggap ng tawag si Senior Insp. Senosin mula sa isang concerned citizen hinggil sa suspek na palakad-lakad umano sa lugar habang may nakasukbit na baril sa beywang.
Kaagad rumesponde ang opisyal kasama ang ilang pulis sa Block 3 Lakas Bisig sa Bgy. Floodway at namataan ang suspek, subalit sinalubong umano sila ng putok ng baril bago ito tumakbo sa madilim na lugar kasama ang isa pang hindi kilalang lalaki.
Tinangka pang pasukuin ng mga pulis ang suspek subalit hinagisan sila nito ng granada, na masuwerteng hindi sumabog, kaya nagawang gumanti ng putok ng grupo ni Senosin.
Sa gitna ng engkuwentro, biglang napuruhan sa ulo si Senosin at sinamantala ito ng suspek at isa pang lalaki para tumakas.
Gayunman, nasundan ng mga pulis ang kasamang lalaki ng suspek na pumasok sa isang bahay, at naaktuhan umano ang pagre-repack ng hinihinalang shabu nina Ronald Idolog at Jophine Lachica, na kaagad na inaresto.
Narekober sa pinangyarihan ng insidente ang hindi sumabog na granada, mga basyo ng bala mula sa iba’t ibang kalibre ng baril, hindi pa batid na dami ng hinihinalang shabu, at drug paraphernalia.
Samantala iniutos kahapon ni Philippine National Police (PNP) chief, Director General Ronald dela Rosa ang agarang pagdakip sa dalawang drug suspect na nakabaril at nakapatay kay Senosin.