1 sa 2 ‘snatcher’ todas sa tandem

Tumimbuwang ang isang lalaking umano’y snatcher habang sugatan naman ang kasamahan nito matapos bistayin ng bala ng riding-in-tandem, habang minalas namang tamaan ng ligaw na bala ang isang bystander sa Port Area, Manila nitong Linggo ng hapon.

Dead on the spot si Melchor Ferreras, alyas “Nanak”, nasa hustong edad at walang permanenteng tirahan, sanhi ng tinamong tama ng bala sa iba’t ibang bahagi ng katawan, habang sugatan naman ang kasamahan niyang si Ronaldo Rosimo, 38, ng 12th Street, Port Area, nang mabaril sa pisngi.

Minalas namang tamaan ng ligaw na bala sa katawan si Jomar Kason, 31, taxi driver.

Sa imbestigasyon ni PO3 Aldeen Legaspi, ng Manila Police District (MPD)- Crimes Against Persons Investigation Section (CAPIS), dakong 5:45 ng hapon nang nangyari ang pamamaril sa Anda Circle malapit sa Old BIR Building.

Nakatayo sa lugar sina Ferreras at Rosimo nang dumating ang dalawang suspek na magkaangkas sa motorsiklo, agad bumunot ng baril ang angkas bago pinaputukan nang maraming beses ang biktima.

Nakatakbo pa si Ferreras subalit hinabol siya ng mga salarin, at natamaan ng ligaw na bala sina Rosimo at Kason.

Batay sa pagsisiyasat ng awtoridad, sinasabing kilabot umanong snatcher sina Ferreras at Rosimo, na kapwa kalalaya pa lang sa Manila City Jail (MCJ) nitong Enero.

Dinala ang bangkay ni Ferreras sa Archangel Funeral para sa awtopsiya.