Cocolife at F2, matibay sa PSL

LIYAMADO ang Cocolife, Petron at F2 Logistics sa pagpalo ng Chooks to Go-Philippine Superliga (PSL) Grand Prix sa Sabado sa Ynares Sports Arena sa Pasig City.

Matapos makausad sa semifinals sa nakalipas na season, higit pang pinalakas ng Asset Managers ang lineup sa torneo na itinataguyod ng Asics, Mikasa, Mueller, Senoh, Brand Sport at UCPB Gen.

Kinuha ng Asset Managers ang serbisyo ni import Sara Klisura mula sa Foton, setter Shawna-Lei Santos at Danika Gendrauli mula sa F2 Logistics at spiker Honey Royse Tubino mula sa Cignal para makatuwang ng mga beteranong sina Tina Salak, Denden Lazaro, Joanne Bunag, Nerissa Bautista at Mary Jean Balse at American import Taylor Milton.

Pangangasiwaan naman ang Cocolife ni Serbian mentor Moro Branislav, pumalit kay Kungfu Reyes, na tatayong assistant coach para makapaghanda sa kanyang gawain sa University of Santo Tomas sa University Athletic Association of the Philippines (UAAP).

“All teams have upgraded their respective lineups so this is going to be a tough road for us. We have to prepare hard and be ready. This is going to be a war,” sambit ni Branislav.

Nawala naman sa Blaze Spikers sina Mina Aganon sa Foton at April Ross Hingpit, Bang Pineda at Marivic Meneses sa Generika-Ayala, ngunit nakuha ang serbisyo nina dating UST standout Chloe Cortez, Luth Malaluan at Pia Gaiser.

“Our campaign last year ended in a heartbreak so we will try our best to win it this time,” pahayag ni Petron coach Shaq Delos Santos.

Hindi naman pahuhuli ang reigning champion Cargo Movers na ipinalit sa nawalang sina Kianna Dy, Dawn Macandili, Majoy Baron ng De La Salle University, sina middle blocker Lourdes Clemente at imports Kennedy Bryan ng United States at Maria Jose Perez ng Venezuela.

“We may have lost some players, but I think we’ll be fine,” sambit ni F2 Logistics coach Ramil de Jesus.