AJ Lim, bumida sa rampa ng UE

TUMATAG ang University of the East sa kampanyang maidepensa ang korona sa men’s division matapos bokyain ang University of the Philippines, 5-0, nitong Linggo sa UAAP Season 80 lawn tennis tournament sa Rizal Memorial Tennis Center.

Nagbalik aksiyon matapos ang matagumpay na kampanya ng Team Philippines sa Davis Cup tie laban sa Indonesia, pinataob ni reigning MVP AJ Lim si Kyle Joseph, 6-0, 6-0, habang ginapi ni Dolfo Barquin si Jerome Silva, 6-1, 6-2, at namayani si Josshua Kinaadman kay Vincent Alanis, 6-0, 6-4, para walisin ng Red Warriors ang duwelo sa singles match.

Sa doubles play, hindi rin pinaporma nina Rogelio Estaño at RJ Saga ang tambalan nina Elijah Arevalo at Mimo Tomacruz, 6-2, 6-2, gayundin ang tambalan nina Jeric delos Santos at Justine Guira kontra Joshua Cano at Joel Atienza, 6-4, 6-3, para sa dominanteng panalo ng UE.

Nanatiling walang gurlis ang Warriors sa nakalipas na tatlong ties.

Nagwagi naman ang Ateneo sa tatlong singles mula kina Ino Canlas, Bong Gonzales at Marcen Gonzales para maungusan ang University of Santo Tomas, 3-2, para tuldukan ang two-ties loss.

Sa women’s division, nakabawi si Kendies Malinis mula sa unang set na kabiguan para pataubin si Jana Pages at sandigan ang UST sa dikitang 3-2 panalo kontra Ateneo.

Naitala ni Malinis ang 1-6, 6-2, 6-3 panalo kay Pages para sa ikalawang sunod na panalo ng Tigresses.

Nagwagi ang UP sa De La Salle, 4-1.