Palasyo: US warship may karapatang bumisita sa WPS
Umaasa ang gobyerno ng Pilipinas na walang mangyayaring “untoward incident” sa pagbisita ng isang nuclear-powered aircraft carrier ng United States sa West Philippine Sea.
Para kay Presidential Spokesman Harry Roque, walang irregular sa pagbisita ng USS Carl Vinson sa rehiyon dahil ito ay bahagi ng “freedom of navigation” operation.
“All vessels, including aircraft carriers, are entitled to freedom of navigation in the WPS (West Philippine Sea). We hope there will be no untoward incident on the occasion of the visit of USS Carl Vinson in our region,” ani Roque.
Kamakailan ay ipinadala ng United States ang Nimitz-class aircraft carrier nito para magsagawa ng maritime security operations sa South China Sea bilang bahagi ng pagsusulong ng freedom of the seas at pagpapalakas sa regional security. Bumisita ang US warship sa panahon ng diumano’y provocative combat missions ng Chinese jets sa pinagtatalunang teritoryo.
Bago dumating ang barko sa Manila, kabilang sina Executive Secretary Salvador Madialdea, Defense Secretary Delfin Lorenzana at Presidential Communications Secretary Martin Andanar sa matataas na opisyal ng pamahalaan na inimbitahang bumisita sa Carl Vinson habang ito ay naglalayag sa South China Sea. Hindi sumama si Pangulong Rodrigo Duterte.