JC at Bela, magtatambal sa ‘MMK’
PAGKATAPOS ng pagtatambal sa big screen ay muling magkakasama sina JC Santos at Bela Padilla sa unang pagkakataon sa telebisyon bilang magkasintahang susubukin ng tukso ngayong gabi sa Maalaala Mo Kaya.
Walang ibang hinangad si Karla (Bela) kung hindi ang makapunta sa Hong Kong Disneyland at makita ang magarbo nitong
fireworks. Bata pa lang siya ay pinapangakuan na siya ng kanyang amang si Alex ( Christian
Vasquez) na dadalhin siya roon basta mataas ang kanyang grades sa school.
Ngunit isang araw, binisita niya ang ama sa trabaho at makikita niya itong may kahalikang ibang babae. Simula noon, natakot nang pumasok sa isang relasyon si Karla.
Tanging si Gio (JC) ang nakakuha ng loob niya sa pamamagitan ng masigasig na panliligaw. Kaya ang dati’y takot umibig ngayon ay in a relationship na.
Taon din ang tinakbo ng kanilang pagiging magkasintahan at maging ang pangarap ni Karla na makapunta sa Hong Kong Disneyland ay sabay din nilang tinupad. Mala-fairy tale na sana ang lahat hanggang sa matuklasan ni Karla na may nilalandi palang iba si JC.
Paano tinanggap ni Karla ang panloloko ni Gio? Bibigyan pa kaya nito ang nobyo ng second chance?
Makakasama nina JC at Bela sa upcoming episode sina Belle Mariano, Zaijian Jaranilla, Almirah Muhlach, Eda Nolan, Heaven Peraleja, Sophia Baars, at Chienna Filomenamula sa panulat ni Joan Habana at sa direksiyon ni Nuel Naval. Ang MMK ay pinamumunuan ng Business Unit Head na si Roda C. dela Cerna.