2 nagsusugal nahulihan ng boga, droga

Kalaboso ang dalawang lalaki, kabilang ang isang menor de edad, nang mahulihan ng baril at hinihinalang droga habang naglalaro ng cara y cruz sa Maynila, nitong Sabado ng madaling araw.

Kinilala ang mga suspek na sina Randy Pillas, 24 anyos, walang trabaho, nakatira sa Barangay Kahilum I, Pandacan; at isang 16-anyos na construction worker.

Sa ulat ng pulisya, nadakip ng pinagsanib na puwersa ng Station Intelligence at Station Drug Enforcement Team, sa pangunguna nina Senior Insps. Edwin Fugan at Loreto Tigno, ang dalawa sa ikinasang anti- criminality campaign sa P.M. Guazon Street sa Bgy. 845, Pandacan, dakong 12:30 ng madaling araw.

Namataan ng mga pulis sa lugar ang dalawang suspek na naglalaro ng cara y cruz, at kinumpiska ang P370 pusta sa sugal. Nakuha rin umano kay Pillas ang isang .38 caliber revolver na kargado ng limang bala, at isang pakete ng hinihinalang shabu.

Kakasuhan ng paglabag sa Anti-Illegal Gambling Law (P.D. 1602) ang dalawang suspek, habang may dagdag na asuntong kakaharapin si Pillas, kabilang ang illegal possession of firearms at paglabag sa Comprehensive Dangerous Drugs Act of 2002 (RA 9165).