5 PNP official pinagpipilian kapalit ni Bato
Limang matataas na opisyal ng Philippine National Police (PNP) ang kuwalipikadong pumalit sa puwesto ni PNP Chief, Director General Ronald “Bato” Dela Rosa.
Sinabi ni Dela Rosa na may limang opisyal na maaaring pumalit sa kanya sa puwesto, kabilang sina Deputy Director General Ramon Apolinario; Deputy Director General Archie Gamboa, chief ng directorial staff; Deputy Director General Fernando Mendez, deputy chief for operations; Director Camilo Cascolan, chief directorate for operations; at National Capital Region Police Office ( NCRPO) Director Oscar Albayalde.
Ayon sa PNP chief, tinanong siya ni Pangulong Duterte kung sino ang napipisil niyang puwedeng pumalit sa kanyang puwesto subalit wala pa sa ngayon ang maaari niyang personal na iendorso.
Enero ngayong taon sana magreretiro si dela Rosa ngunit pinalawig ng Pangulo ang kanyang pamumuno hanggang sa Abril.