398 sinipa sa PNP
May kabuuang 398 pulis ang nasibak sa serbisyo simula noong Enero 2016, halos kalahati nito ay dahil sa pagkakasangkot sa mga kaso at paggamit ng ilegal na droga.
Sinabi ni Chief Supt. John Bulalacao, tagapagsalita ng Philippine National Police (PNP), na 1,216 na iba pang pulis ang naparusahan sa mga paglabag na may katumbas na parusang pagbawi sa suweldo hanggang suspensiyon at demosyon, o pagbaba ng ranggo.
“This is part of the continuous internal reform in the organization. The penalties which include dismissal from the service are due to administrative cases,” ani Bulalacao.
Karamihan sa mga na-dismiss ay sa panahon ng liderato ni PNP chief Director General Ronald dela Rosa, na pinalawig pa ni Pangulong Duterte ang pamumuno upang habulin pa ang mga scalawag sa pulisya.
Kabilang sa mga nasibak ang mga opisyal ng PNP, 151 sa mga ito ang nagpositibo sa paggamit ng ilegal na droga, habang 18 iba pa ang nasangkot sa drug-related activities.
Nabatid na kasama sa naturang bilang ang isang police colonel, na naaktuhang bumabatak ng shabu sa isang raid sa Las Piñas City noong 2017.
Bukod sa droga, isa pang sanhi ng pagkakatanggal sa serbisyo ng isang pulis ay ang hindi pagdalo sa mga pagdinig sa korte na nagreresulta sa pagkakabasura ng kaso laban sa mga tulak at adik.
Ayon pa kay Bulalacao, nasa 91 pulis ang na-dismiss dahil sa Absence Without Official Leave (AWOL), 10 ang sangkot sa kidnapping, 22 sa murder, tatlo sa rape, anim sa homicide, dalawa sa parricide, at tatlo sa illegal arrest and detention.
“Twenty- three more were dismissed for involvement in robbery/extortion, one for graft and malversation of public funds; and 70 others for grave misconduct that stemmed from immorality, dishonesty, estafa,” ani Bulalacao.
“Aside from those dismissed, 1,216 other personnel were meted disciplinary penalties in 2016-2018 ranging from demotion, suspension, reprimand, restriction, and salary forfeiture,” dugtong nito.
Simula 2016, umabot sa 14,515 kasong administratibo ang inimbestigahan, at 8,422 sa mga ito ang naresolba, habang may 6,093 kasong administratibo ang nakabimbin ang resolusyon.