Maute sali na sa US terror list
WASHINGTON (Reuters) – Inihayag nitong Martes ng U.S. Treasury Department na dalawang indibidwal at pitong organisasyon sa Africa at Asia na konektado sa Islamic States ang idinagdag sa sanctions list nito.
Sinabi sa website ng Office of Foreign Assets Control (OFAC) ng Treasury na idinagdag sina Abu Musab Al-Barnawi ng Nigeria at Mahad Moalim ng Somalia, at pito pang grupo mula sa Bangladesh, Egypt, Pilipinas, Somalia, Nigeria at Tunisia sa sanctions list nito.
Kabilang sa mga idinagdag ang ISISBangladesh, ISIS-Egypt, ISIS-Philippines, ISISSomalia, ISIS-West Africa, Jund al-KhilafahTunisia, na kilala rin bilang ISIS-Tunisia, at ang Philippines-based Maute Group, na kilala rin bilang Islamic State of Lanao, sinabi ng OFAC.
Ayon sa U.S. State Department, kasama ang huling mga idinagdag, mayroong 40 Islamic State leaders at operatives simula pa noong 2011 ang kabilang sa listahan ng Specially Designated Global Terrorists at Foreign Terrorist Organizations sa ilalim kautusan na naglalayong pagkaitan sila ng access sa U.S. financial system.
“These designations are part of a larger comprehensive plan to defeat ISIS that, in coordination with the 75-member Global Coalition to Defeat ISIS, has made significant progress toward that goal,” saad sa pahayag.
Ang pagsisikap na ito “is destroying ISIS in its safe havens, denying its ability to recruit foreign terrorist fighters, stifling its financial resources, negating the false propaganda it disseminates over the internet and social media, and helping to stabilize liberated areas in Iraq and Syria so the displaced can return to their homes and begin to rebuild their lives,” ayon pa rito.
‘PINAS NATUWA
Ikinatuwa kahapon ng Department of National Defense (DND) at ng Armed Forces of the Philippines (AFP) ang pagsama ng United States sa Maute Group at ISIS-PH sa listahan ng mga teroristang organisasyon.
Sa isang pahayag, sinabi ni DND Public Affairs chief Director Arsenio Andolong, na ang pagsama sa Maute Group at ISIS-PH sa listahan ay patunay nang matagal nang nalalaman ng mga awtoridad ng Pilipinas – na ang Maute Group at ang Dawlah-Islamiya ay mga teroristang grupo na kailangang harapin nang buong puwersa ng batas.
“As such, they will be denied access to the US financial system and will face sanctions as may be deemed appropriate, making it more difficult for them to conduct their activities in the Philippines and abroad,” ani Andolong.
Sinabi naman ni AFP spokesman and concurrent Civil Relations Office (CRS) chief Brig. Gen. Bienvenido Datuin Jr., na malaki ang maitutulong ng pagdagdag sa mga nasabing grupo sa US terror list para malabanan ang mga lokal na terorista at kanilang mga dayuhang kasabwat.
Itinuturing ng Malacañang na “positive development” ang pagsama ng US sa Maute Group sa listahan ng foreign terrorist organizations
Ayon kay Presidential Spokesperson Harry Roque, pinatutunayan nito ang paniniwala ng Pilipinas na ang Maute Group ay inaayudahan ng mga banyagang elemento.
“This reaffirms our long-held belief that the Maute Group is composed of local terrorists aided by foreign extremists,” aniya.