Anti-dynasty provision pasok sa BBL
Inaprubahan ng Senate panel ang pagsama sa anti-dynasty provision sa panukalang Bangsamoro Basic Law (BBL) na magbabawal sa paghalal sa magkakamag-anak na opisyal ng gobyerno sa parliament.
Ipinahayag ni Senador Juan Miguel Zubiri, chair ng Senate subcommittee on BBL, sa kanyang talumpati nitong Miyerkules ang pag-eendorso sa hakbang para pagdebatehan sa plenaryo.
Sinabi ni Zubiri na ang inaprubahang BBL ng Senate panel ay mayroong antidynasty provision na nagsasaad na walang kinatawan ng partido ang dapat na may relasyon sa district representative o isa pang kinatawan ng partido sa parliament hanggang sa second degree of consanguinty o affinity.
Sa press briefing matapos ang kanyang sponsorship speech, inamin ni Zubiri na ang pagsama sa ganitong kontrobersiyal na probisyon ang mainit na pinagdebatehan sa mga pagpupulong ng technical working group ng subcommittee.
Sinabi niya na nagkasundo kalaunan ang mga bumubuo ng technical working group na limitahan ang sakop ng probisyon sa loob ng 80-member parliament ng panukalang Bangsamoro region.
Ang panukalang Bangsamoro Autonomous Region ay magtatamasa ng fiscal autonomy at pagkakalooban ng block grant na nagkakahalaga ng anim na porsiyento ng annual revenue ng bansa.
Isang special development fund na P100 bilyon, na ilalabas sa 10 equal instalments bawat taon, ang ilalaan din sa rehiyon para maisaayos ang mga nasirang imprastraktura dahil sa digmaan.
Umaasa si Zubiri na na lulusot ang panukalang BBL sa plenary debates ng Senado at maaaprubahan ito pagsapit ng Marso 21.
Sinabi niya na isusumite niya ang committee report kay Executive Secretary Salvador Medialdea, na nangangakong tatalakayin ito sa Cabinet meeting sa Lunes para masertipikahang urgent ni Pangulong Rodrigo Duterte.