Bgy. official at misis tinambangan

Away sa lupa ang sinisilip na motibo sa pananambang sa isang barangay official at sa misis nito, habang sugatan naman ang kanilang anak, sa Antipolo City kamakalawa.

Kinilala ang mga nasawi na sina Domingo Mamaril, 53, barangay administrator; Maribel Mamaril, 53, guro; sugatan naman si Sharmane Joy Mamaril, 21, guro, pawang ng Sitio Biong, Barangay San Luis, Antipolo City.

Nagsitakas naman ang hindi pa nakikilalang mga suspek.

Sa ulat ng Antipolo City Police, naganap ang pananambang sa Manuel L. Quezon Circumferential Road sa Bgy. San Roque, bandang 5:40 ng hapon.

Sakay ang pamilya sa berdeng Ford Escape ( XMS 759) nang sumulpot ang mga suspek at pinagbabaril si Domingo, na siyang nagmamaneho ng sasakyan, gayundin si Maribel.

Dahil sugatan, nawalan ng kontrol si Domingo sa sasakyan at nabangga niya ang iba pang sasakyan na kinabibilangan ng isang Honda motorcycle, na minamaneho ni Jovito de Leon, at ikinasugat ng angkas niyang si Ruben Domaoan, Jr., 27; at isang Toyota Innova (VU- 9526) na minamaneho ni Rodel Bong Cabanal, 26.

Nadamay din ang isang company bus ( UVR- 674) na nakarehistro sa NSP Transportation Services at minamaneho naman ni Randy Astronomo.

Ayon sa pulisya, posibleng may kinalaman sa away sa lupa ang motibo sa pagpatay matapos lumitaw sa imbestigasyon na bilang barangay administrator, si Domingo ang naatasang maningil ng monthly dues sa mga lupang inuupahan ng mga residente sa kanilang barangay.

Patuloy ang imbestigasyon sa insidente.