Imbestigasyon ng Kongreso Banta sa ekonomiya

NAGPALUTANGng mga alalahanin na katotohanang nakaaambag sa takot ng mga ‘investors,’ ang ilang imbestigasyon ng Kongreso “in aid of legislation” na tila hindi mainam ang mamuhunan sa Pilipinas.

Kabilang sa mga nakakaalarmang alalahaning ito sa mga investor ang mahabang pagsisiyasat ng kongreso sa mga negosyo, ang pamumulitika ng ilang mambabatas, ang mga pang-iinsulto sa mga inimbitang ‘resource persons,’ ang paghahanap ng kamalian sa mga bagay na walang kinalaman sa paksa ng pagsisiyasat, at ang patutsada ng mga mambabatas sa inaakala nilang mga kaaway.

Nakakalungkot na ang apektado na naturang mga pagsisiyasat na ito ng Kongreso ay ang mga negosyong nakapagdudulot ng yaman at trabaho para sa mga Pilipino.

Halimbawa, nakalimang ‘public hearings’ na ang Kamara sa ‘joint venture agreement ng Bureau of Corrections (BuCor) at ang Tagum Agricultural Development Co. Inc. (TADECO) mula noong 2017 na nagkakaroon ito ng seryosong mga implikasyon sa ekonomiya.

Sa kaso ng BuCor- TADECO, kabilang sa masasamang epekto nito ang kanselasyon ng mga kontrata sa mga partner sa negosyo na mauuwi sa kawalan ng kita ng kumpanya, buwis sa pamahalaan, mga trabaho at kabuhayan ng mga manggagawa, at mababang taripa sa pandaigdigang kalakalan.

Sa ilalim ni House Speaker Pantaleon Alvarez, maaaring tratuhin ng Kamara ang partikular na kaso, bilang isang simpleng kailangang krusada lamang, ngunit malawak ang maaring maging negatibong epekto nito sa pananaw ng mga mamumuhunan sa bansa. Ang lalo pang nakababahala ay ang katotohanan ng lantarang pagpursige ng mga personal adyenda ng ilang taong sangkot sa mga ito.

Sa naturang mga pagsisiyasat, nakakainis din ang paghahalo sa mga isyung walang kaugnayan sa usapin na ang ilan ay lantarang personal lamang. Tuloy, ang komperensiyang “in aid of legislation” ay nagiging pagkakataon lamang upang ipagmayabang ang kahusayan ng ilan sa mga debate at pananalita ngunit wala namang naiaambag sa usapin. Sa totoo lang, walang gaanong mahalagang mga bagong batas ang nagmumula sa naturang mga imbestigasyon.

Walang gaanong nagagawang kabutihan ang ganitong mga pagsisiyasat. Pinagmumulan pa ito ng maaanghang na mga patutusada ng ilang mambabatas at opisyal ng pamahalaan laban sa mga inaakala nilang sumasalungat sa kanilang political agenda.

Tila walang pakialam sa negatibong mga epekto sa ekonomiya ang ilang mga lider natin na sobra- sobra ang ginagawang pamumulitika. Ang tingin tuloy ng ilan ay kinakasangkapan lamang ang mga lehislatibong pagsisiyasat para kumita, dahil tanging Kongreso ang mayroong kapangyarihang magisyu ng prangkisa.

Dapat matalinong gamitin ang pagsisisyasat sa Kongreso bilang kasangkapan din sa pagpapalago ng ekonomiya.