‘Salamat Dok’ at Hospital on Wheels, umarangkada sa Albay
MATAPOS ilunsad sa programang
Salamat Dok, bumiyahe agad patungong Albay sa Bicol Region ang RP Healthcraft Carrier o Hospital on Wheels nitong nakaraang buwan para maghatid ng tulong at serbisyong medikal sa mga naapektuhan ng pagaalburuto ng Bulkang Mayon.
Ito ang kauna- unahang pagarangkada sa probinsiya ng Hospital on Wheels, na may pasilidad para maisagawa ang iba’t ibang operasyon. Labinwalong pasyente sa Albay ang naoperahan sa nasabing bus sa tulong ng mga volunteer na doktor sa pangunguna ni Dr. Jim Sanchez. Umaabot naman sa 600 ang nakakuha ng libreng konsultasyon sa medical mission ng programa sa Bical National High School sa Sitio Bacal, Salvacion, Sto. Domingo, Albay.
Isa sa mga naging pasyente si Nanay Nilda Briobo, na tatlong taon nang may bukol sa kaliwang bahagi ng leeg na umabot na sa panga. Gayunpaman, naitataguyod pa rin niya ang pamilya kasama ng kanyang asawang construction worker sa pagtanggap ng labada.
Nagalak si Nanay Nilda nang mabalitaan ang pagdating Hospital on Wheels at umasang maipatatanggal na niya ang bukol na nagpapahirap sa kanya at nagdadala sa kanya ng hiya. Aniya, “Masaya na ako kasi hindi na ako mahihiyang humarap sa tao. Masaya ako na nangyari na po ang pinapagarap ko na maoperahan ako.”
Masaya rin ang mga kababayan niyang sumalubong sa Salamat Dok at Hospital on Wheels, na naghandog rin ng checkup sa ngipin sa tulong ng mag-asawang dentistang sina Eugen at Teresita Ribu, namigay ng 300 relief packs kasama ang Rotary Club of Malate, at nagsagawa ng libreng gupit sa tulong ng 9th Infantry division ng Philippine Army sa pamumuno ni Lt. Col. Pat Cinco.
Tinulungan din ng tanggapan ng Bantay Bata 163 sa Naga City ang mahigit sa 300 kabataan na maibsan ang takot at kaba dulot ng kanilang pinagdaanan sa pagpapalabas ng mga pelikulang may aral at mga nakakaaliw na palaro.
Naghahatid ang Salamat Dok, sa pangunguna ng anchors na sina Alvin Elchico, Bernadette Sembrano-Aguinaldo, at Jing Castaneda, ng tulong medikal sa mga pamilyang Pilipino na walang kakayahang magpagamot o magpaopera sa pamamagitan ng Hospital on Wheels. Abangan ang susunod na biyahe ng Hospital on Wheels at alamin ang iba pang kaalamang makakatulong sa pangangalaga sa pamilyang Pilipino sa
Salamat Dok tuwing 6 AM kung Sabado at 7:30 AM kung Linggo sa ABS-CBN o ABS-CBN HD (SkyCable Ch. 167). Napapanood din ito online sa iwantv.com.ph o skyondemand.com.ph. Para sa updates, sundan ang kanilang social media accounts sa Facebook (@ABSCBNsalamatdok) at Twitter (@salamatdok).