Carlo Aquino, gaganap na bulag sa ‘MMK’
NAGBABALIK sa Maalaala Mo Kaya
( MMK) si Carlo Aquino ngayong Sabado, Marso 3 sa isang madamdaming pagganap bilang sikat at bulag na motivational speaker galing Baguio na hindi naging hadlang ang kondisyon upang maging inspirasyon sa kapwa.
Ang tanging hangad sa buhay ni Paolo (Carlo) ay matulungan ang kanyang bulag na inang si Tess ( Irma
Adlawan) na mag-isang itinataguyod ang kanilang pamilya.
Kahit mahirap, sinikap ni Paolo na makapagtapos ng pag-aaral at naging customer sales representative sa isang magandang kumpanya sa Maynila.
Ngunit habang nasa kasagsagan ng kanyang pag-angat sa trabaho, nagsimulang lumabo ang kanyang mga mata. Nagdulot ito ng diskriminasyon at pangungutya na nagdulot sa kanya ng depression.
Lalo pang lalalim ang kanyang kalungkutan at magpapasyang iwanan na lang ang Maynila at umuwi sa Baguio.
Paano aahon si Paolo mula sa pagkakalugmok? Ano ang nag-udyok sa kanyang upang maging motivational speaker at maging mabuting ehemplo sa kanyang komunidad?
Makakasama nina Carlo at Irma sa upcoming episode sina Lui Villaruz, Noel Colet, CX Navarro, Lester Llansang, Roeder Camanag, Jojo Abellana, JJ Quillantang, at Yñigo Delen,
mula sa panulat nina Mae Rose Balanay at Arah Jell Badayos at sa direksiyon nina
Mae Cruz Alviar at Nuel Naval. Ang MMK ay pinamumunuan ng business unit head na si Roda C. dela Cerna.