Grade 6 student patay sa ligaw na bala
Nagbuwis ng buhay ang isang Grade 6 student matapos tamaan ng ligaw na bala habang nakatayo sa sementong bakod sa Tondo, Maynila, iniulat kahapon.
Naisugod pa sa Tondo Medical Center si Aldrine C. Pineda, 13, ng Unit 309, Building 8, Katuparan, Vitas, Tondo, Maynila ngunit binawian din ng buhay dahil sa tumamang bala sa tiyan, kahapon ng madaling araw.
Samantala, inaalam na ng awtoridad kung sino ang responsable sa pagpapaputok ng baril.
Sa inisyal na ulat ni PO3 Marlon San Pedro, ng Manila Police District-Crimes Against Persons Investigation Section, naganap ang insidente sa konkretong bakod ng Vitas Slaughterhouse sa Vitas, Tondo, dakong 8:00 ng gabi.
Nakaupo ang biktima katabi ang dalawang lalaki na umano’y kumaway at nang-asar sa isang lalaking may hawak na flashlight.
Makalipas ang ilang sandali ay umalis na ang dalawang hindi pa nakikilalang lalaki at naiwan ang biktima. Patayo na ang biktima nang makarinig ng putok ng baril.
Agad umalis ang lalaking may hawak ng flashlight at pumasok sa slaughterhouse, habang nagawa pang makauwi ng biktima at nasabi pa sa kanyang ina ang nangyari ngunit nalagutan din ng ng hininga sa ospital makalipas ang walong oras.
Patuloy ang imbestigasyon sa insidente.