100 huli sa paglabag sa ordinansa
Nasa 100 katao, kabilang ang mga menor- de- edad, ang dinampot sa simultaneous police operations sa Caloocan City, simula nitong Biyernes ng gabi hanggang kahapon ng madaling araw.
Pinangunahan mismo ni Senior Supt. Jemar Modequillo, hepe ng Caloocan City Police, ang Simultaneous Anti- Criminality and Law Enforcement Operations (SACLEO) sa mga nasasakupang barangay, dakong 10:00 ng gabi.
Base sa ulat, diretso sa selda ang 46 na indibiduwal na naaktuhang nag- iinuman sa pampublikong lugar at nakahubad-baro.
Nabatid na aabot naman sa 43 kabataan ang nasagip ng awtoridad matapos lumabag sa curfew na nagsisimula dakong 10:00 ng gabi hanggang 5:00 ng madaling araw.
Idiniretso ang mga menorde-edad sa City Social Welfare Development.
Nadakip din ng awtoridad ang ilang indibiduwal na nakumpiskahan ng umano’y ilegal na droga at namataang nagsusugal.
Bukod pa rito, kinumpiska ang sampung motorsiklo na pawang walang kaukulang dokumento.
Tiniyak ni Modequillo na magpapatuloy ang kanilang operasyon laban sa mga lumalabag sa mga ordinansa.