2 African tiklo sa R2.5- M ‘shabu’
Nadakip ng mga tauhan ng Philippine Drug Enforcement Agency (PDEA) ang dalawang miyembro umano ng bigtime African drug syndicate, matapos magbenta ng P2.5 milyong halaga ng shabu sa entrapment operation sa Cavite, iniulat kahapon.
Kinilala ni PDEA Director General Aaron N. Aquino ang mga suspek na sina Agu Austin Chukwuebuka at Nkwocha Chimaobi, kapwa Nigerian.
Sa imbestigasyon ng PDEA, nagsagawa ng entrapment operation ang PDEA- Special Enforcement Service, sa pamumuno nina Director Levi Ortiz, PDEA Regional Office IV-A (PDEA RO IV-A) CALABARZON, Director Adrian Alvariño at ng PDEA Regional Office V (PDEA ROV) Camarines Sur Provincial Office, laban sa mga suspek, bandang 2:00 ng hapon nitong Biyernes.
Ayon sa PDEA, binentahan ng mga dayuhan ng 500 gramo ng umano’y shabu, na may street value na P2,500,000, ang isang pulis na nagsilbing poseur-buyer sa parking lot ng isang fastfood chain sa Talaba 4, Bacoor City, Cavite.
Sinasabing kumikilos ang dalawang miyembro ng naturang sindikato at nagsu- supply ng bultu- bultong droga sa buong Bicol Region at CALABARZON.
Sa pagsisiyasat, nakuha ang mga numero ng dalawang Nigerian kasunod ng pagkakaaresto ng umano’y big-time drug lord na si Olivia Encinas sa Almeda Highway sa Naga City noong Nobyembre 4, 2017, kasabay ng pagkakadakip sa dalawang miyembro ng African Drug Syndicate na sina Solomon Anochiwa at Desmond Ozoma sa Kawit, Cavite.
Kasalukuyang nakakulong sina Chukwuebuka at Chimaobi sa PDEA sa Quezon City at sinampahan ng kasong paglabag sa Comprehensive Dangerous Drugs Act of 2002 (RA 9165).