Nikki Teodoro bagong UNICEF envoy

Itinalaga ni Pangulong Duterte si Monica “Nikki” Prieto-Teodoro, asawa ni dating Defense Secretary Gilbert Teodoro, bilang kanyang kinatawan sa United Nations Children’s Fund (UNICEF).

Batay sa kanyang appointment papers na nilagdaan nitong Marso 7, si Teodoro ang magsisilbing Special Envoy of the President to the UNICEF simula Setyembre 26, 2017 hanggang Setyembre 27, 2018.

Bukod kay Teodoro, itinalaga rin ni Duterte si Melissa Avanceña Aradanas, pinsan ng commonlaw wife ng Pangulo na si Honeylet, bilang deputy secretary general ng Housing and Urban Development Coordinating Council (HUDCC), kapalit ni Patrocinio Jude Esguerra III.

Muling binigyan ng appointment si Aradanas tatlong buwan makaraan siyang sibakin kasama ng iba pang mga opisyal ng Presidential Commission for the Urban Poor (PCUP) dahil umano sa labis na pagbiyahe.

Bagong appointees din ng Pangulo sina Ma. Mercedes Dumagan, Felix Alicer, at Marcia Isip bilang mga director ng Department of the Environment and Natural Resources (DENR); Lorina Noemi Silvino sa Cinema Evaluation Board; Meizelle Antoni, Jennifer Santos, at Elenita Esguerra-Yu sa Department of Labor and Employment (DoLE).

Itinalaga rin ng Presidente si Bureau of Corrections (BuCor) Deputy Director Valfrie Tabian bilang acting director-general ng kawanihan; si Bruce Concepcion bilang Special Envoy on Transnational Crime; si Nannette VillamorDinopol bilang Maritime Industry Authority (MARINA) deputy administrator; at sina Arnelyn May Abdon, Euvimil Nina Asuncion, Lilia Tan, Emee Macabales, at Mark David Ablang bilang Finance directors.