Basura at ang panlipunang responsibilidad ng bawat mamimili

KAPANALIG, ang basura ay isa sa mga pinakamalaking problema ng maraming mga siyudad ngayon sa ating bansa. Ang problema ng basura ay mas lalo pang pinalala ng mabilis na urbanisasyon, pagtaas ng populasyon, at industriyalisasyon.

Ayon sa datos ng National Solid Waste Management Commission (NSWMC), tuloy tuloy ang pagdami ng basura sa ating bansa. Mula 37, 427 tonelada kada araw noong 2012, umakyat na ito ng 40,087 tonelada noong 2016. Halos kalahating kilo ng basura ang nalilikha ng bawat mamamayan bawat araw.

Ang Metro Manila ang may pinaka- maraming bilang ng basura sa bansa. Mga 9, 213 tonelada kada araw ang nakukuha mula dito, sunod naman sa Region 4A na umaabot sa 4, 440 tonelada ng basura kada araw. Pangatlo ang Region 3, kung saan 3, 890 tonelada ang basura kada araw. Kailangang mapigil ang pagdami ng basura. Ang zerowaste movement ay isang paraan upang magawa ito.

Narinig mo na ba ang zerowaste movement? Ito ay isang lifestyle alternative na pinipili ng mas maraming tao, lalo na sa mga highly urbanized countries. Ito ay ang uri ng pamumuhay kung saan nilalayon ng tao na halos walang basura siyang malilikha sa kanyang lifetime.

Maraming maaring magawa upang maisabuhay ang zerowaste lifestyle. Isa dito ay ang pagbawas ng pag- gamit ng plastic. Lubhang nakakasira ng ating mundo ang plastic. Padami ng padami ang basurang plastic, at ayon sa mga siyentipiko, tinatayang 299 milyong tonelada ng plastic ang nalikha noong 2013, at noong 2015, mga 297.5 milyong tonelada ang nakonsumo ng tao. Kada taon, mga walong milyong tonelada naman ng plastic ang natatapon sa ating mga karagatan.

Ang zero-waste movement ay mahirap gawin, ngunit ito ay hindi imposible. Maliban sa pagbabawas ng paggamit ng plastic, maaari rin tayong mag-recycle at gumamit ng compost pit. Maaari rin nating bantayan ang ating pagkonsumo, at siguraduhin na ang kailangan lamang ang ating kukunin. Sayang naman kung laging bibili at sa basura lamang sila matatagpuan sa huli.

Si Pope Francis ay may akmang gabay ukol dito mula sa kanyang Laudato Si: Ang pagbabago sa ating uri ng pamumuhay ay maaari ring umudyok sa ating mga lider, mapapulitika, panlipunan, at ekonomiya, na magbago rin ng gawi. Kapag ang mga konsumer ay sinusuri ang kanilang binibili at ginagamit, binabago rin nito ang operasyon ng mga negosyo, at hinihikayat nito na suriin ang kanilang carbon footprint pati mga paraan ng produksyon. Kaya’t napakalaki ng panlipunang responsibilidad ng mga konsumers. Ang pagbili at paggamit ay isang moral act sa gitna ng napakalawak na degradasyon ng ating mundo.