Divorce bill lulusot sa Kamara ngayong linggo

Inaasahang maaprubahan na sa huling pagbasa ng Kamara de Representantes bago magbakasyon ang Kongreso sa Huwebes, ang panukalang batas para magkaroon ng diborsiyo sa bansa, dahil na rin sa matamlay na pagtutol ng Simbahang Katoliko sa usapin.

Higit pang luminaw ang pagtayang ito matapos na 14 lang sa 100 kongresistang dumalo sa all-party caucus noong nakaraang linggo ang bumoto laban sa pagpapasa sa House Bill 7303 (Absolute Divorce Act of 2018).

Pasado na sa ikalawang pagbasa nitong Miyerkules ang nasabing panukalang batas.

Bukod dito, tinataya ring papasa sa ikatlong pagbasa ang panukala na kikilala sa decree of divorce, katulad ng pagpapahintulot ng ibang bansa, at ang House Bill 7378 na magpapahintulot naman sa ikatlong pagpapaliban sa Barangay at Sangguniang Kabataan elections sa Mayo 14, 2018, para idaos na lang sa Oktubre 8, 2018.

Naniniwala naman si Ako Bicol Party-list Rep. Rodel Batocabe na kahit madali na lamang maipasa ang HB 7303 sa Mababang Kapulungan ay dapat asahang mahihirapan itong lumusot sa Senado.

“But we were told that only provisions calling for absolute divorce will be thrown out, dissolution of marriage is acceptable among senators,” paliwanag ni Batocabe.

Maliban sa grupo ng mga Katolikong pinamumunuan ni Senior Deputy Minority Leader at Buhay Partylist Rep. Lito Atienza na mariing tumutol sa panukala, malinaw na unanimous ang suporta ng mga kongresista sa kontrobersiyal na panukala.

Nagpahayag din si Atienza na idudulog niya sa Korte Suprema ang pagharang niya sa Divorce Bill sakaling suportahan din ito ng Senado.

“This proposed law is definitely unconstitutional! It is expressly stated in Article XV on The Family, Section 2, that ‘Marriage, as an inviolable social institution, is the foundation of the family and shall be protected by the State,” paliwanag ni Atienza.

“Every definition that can be found on the word inviolable states that it is unassailable, cannot be broken, cannot be interchanged, and anything inviolable is considered hallowed, holy, sacred, sacrosanct and untouchable,” dagdag pa ni Atienza.