Polls postponement mabubutata sa Senado

Tiniyak kahapon ni Senator Francis Escudero na may sapat silang bilang sa majority bloc upang harangin ang planong ipagpaliban muli ang Barangay at Sangguniang Kabataan elections sa Mayo 14.

Sinabi ni Escudero na wala nang kahihinatnan ang anumang legislative measure para harangin ang halalan dahil magre-recess na ang Senado at Kamara de Representantes sa Huwebes.

Gayunman, maaari rin aniya itong masapawan kung ibibigay ng Malacañang sa Kongreso ang isang certified bill na nagpapaliban sa eleksiyon, dahil ipinatutupad nito ang puwersa ng batas.

Ngunit, inihayag ni Escudero na walang may gusto, kahit isa sa tinatawag na “Viber Group’’ ng Senate majority bloc na maipagpaliban ang halalan.

Dalawang beses nang naipagpaliban ang barangay at SK election.

Sumusuporta rin ang ilang senador sa pagsasagawa ng eleksiyon sa itinakdang petsa, dahil tinitimbang ngayon ng mga botante ang alegasyon ng Palasyo na aabot sa 40 porsiyento ng mga opisyal ng barangay ay sangkot umano sa bentahan ng ilegal na droga.

Matatandaang pumapayag din si Pangulong Duterte sa pagpapaliban ng halalan dahil may mga pondo, aniya, para sa pangangampanya ng mga opisyal ng barangay na sangkot sa droga.

Nais ding malaman ni Escudero kung sino ang magtatalaga ng mga bagong opisyal ng barangay kapag natuloy ang pagpapaliban ng eleksiyon.

“Should it be the mayor, governor or the President?” tanong ni Escudero.