Internet at e-classrooms para sa mga pampublikong paaralan
INIHAYAG ng Department of Education (DepEd) ang plano nitong magkabit ng Internet connection sa lahat ng pampublikong paaralan sa bansa upang maiangat ang kalidad ng pagtuturo at kaalaman.
Sa isang pahayag, ipinaliwanag ni Education Undersecretary for Administration Alain Del Pascua ang kahalagahan ng paggamit ng teknolohiya sa mga paaralan para sa kapakanan ng mga Pilipinong mag-aaral.
“We are eyeing the implementation of the DepEd Internet Connectivity Program which will be first implemented in five pilot regions. We have allotted P1-billion fund for the said program and we’ll be trying all platforms and devices to deliver internet connectivity to schools such as broadband, satellite, etc.,” ani Del Pascua.
Idinagdag ni Del Pascua na plano ng DepEd na magkaroon ng “e-classrooms” sa mga pampublikong paaralan kung saan ang mga tradisyunal na pisara ay papalitan ng digital boards na maaaring magamit ng mga guro at mag-aaral sa panonood ng mga educational video, presentation at iba pang educational resources.
Sinabi ni Del Pascua na ang plano “will be fulfilled in conjunction with the DepEd Computerization Program (DCP) which aims to raise the information and communications technology literacy of learners, teachers, and school heads by integrating in the school system and providing information technology (IT) equipment to schools nationwide”.
Ayon sa kanya, ang lahat ng DCP unit na ipinamahagi sa mga paaralan ay may kasamang mga offline video na kailangan sa pag-aaral upang magamit ang mga ito kahit walang Internet connections.
“’Yung computers na idi-distribute, mayroon na ‘yang nakapasok sa hard disk and offline version nung portal ng DepEd, may mga learning materials na rin po na naka-save doon. So kahit walang Internet, mayroon na siyang resources kaagad na maa-access,” paliwanag ni Del Pascua.
Una nang binanggit ni Del Pascua na tinatayang 14,289,301 mag-aaral at 451,118 guro sa pampublikong paaralan ang makikinabang sa DCP. Sinabi rin niya na may 462,114 IT na itatalaga sa mga paaralan ngayong taon. Aabot sa P8.6 bilyon ang budget na inilaan ng Deped para sa DCP ngayong 2018.