Pinoy journo, Pulitzer winner
Nagwagi ang isang Pilipinong mamamahayag ng prestihiyosong Pulitzer Prize for international reporting, kasama ang dalawa pang kasamahan sa Reuters, kaugnay ng serye ng kanilang pagbabalita tungkol sa pagpapatupad ng pulisya ng kontrobersiyal na kampanya kontra droga sa Pilipinas.
Iginawad ng Pulitzer board ang international reporting prize sa Pilipinong mamamahayag na si Manuel Mogato at sa dalawa pang Reuters reporter na sina Clare Baldwin at Andrew R.C. Marshall, bilang pagkilala sa kanilang “relentless reporting that exposed the brutal killing campaign behind Philippines President Rodrigo Duterte’s war on drugs.”
Iginagawad simula 1917, ang Pulitzer Prize ang pinakaprestihiyosong parangal sa pamamahayag sa Amerika.
PRESS FREEDOM
Sa panig ng Philippine National Police (PNP), sinabi nito kahapon na inirerespeto ng pulisya ang mga organizer ng Pulitzer sa Amerika na nagkaloob ng pagkilala sa grupo ni Mogato dahil sa pag-uulat tungkol sa drug war.
“The PNP respects the judgement of the organizers of the Pulitzer Prize for the award given to Mr. Manny Mogato of Reuters,” saad sa text message ni Chief Supt. John Bulalacao, tagapagsalita ng PNP, sa Balita.
“While the issue on alleged EJKs (extra judicial killings) remains unproven, we look at his articles within the perspective of press freedom which is part of the checks and balances of a democratic society,” dagdag pa ni Bulalacao.
Noong nakaraang buwan lamang ay nagwagi rin ang “Duterte’s War” nina Mogato, Baldwin at Marshall sa Investigations category, at kinilala rin para sa Amnesty for the Outstanding Impact Award dahil sa “brave reporting that provided key evidence in the campaign against the killings.”
Nanalo rin ang nasabing serye ng Reuters ng Overseas Press Club Award para sa Best Investigative Reporting.
‘SHOCKED’ PERO ‘HAPPY’
Samantala, sinabi ni Mogato sa
Balita na siya ay “very happy”, at “shocked” pa nga dahil siya “did not expect” na magwawagi siya ng nasabing prestihiyosong parangal sa pagbabalita.
Mahigit 30 taon nang mamamahayag sa Pilipinas, si Mogato ang political at general news correspondent ng Thomson Reuters sa Pilipinas sa nakalipas na 13 taon, at nagbabalita tungkol sa pulitika, kalamidad, rebelyon, at international diplomacy.
Una na siyang pinarangalan ng Reuters Journalist of the Year nang mag-ulat tungkol sa kurapsiyon sa casino deal sa Maynila, finalist ng Society of Publishers in Asia (SOPA) noong 2013 sa kanyang coverage sa bagyong ‘Yolanda’ at noong 2017 para sa drug war; at ng Human Rights Press awards para pa rin sa kampanya kontra droga noong 2017.