Mas maraming programa ng gobyerno para sa sahod, presyo at trabaho

ELEKSIYON ang pangunahing paraan upang maiparating ng mga mamamayan ang kanilang hinaing sa pamahalaan. Sa pamamagitan ng piniling mga opisyal, ipinapahayag ng mga ito kung anong daan ang tatahakin ng bansa. Muli nating inihahalal ang isang opisyal o ang iniendorso nito kung naging maganda ang pamamalakad nito sa pamahalaan. O bumoboto tayo ng bago kung hindi naging maayos ang pamamahala o kaya ay naging abusado. Sa pagitan ng eleksiyon, kailangan mapanatili ng isang opisyal ng gobyerno ang magandang relasyon nito sa mga tao. Ang ilang magaling makitungo ay muling nakababalik sa opisina dahil nasiyahan ang kanilang mga nasasakupan.

Sa modernong panahon, nagsisilbing mahalagang daan ang survey upang masabi ng mga mamamayan sa mga opisyal ang kanilang palagay sa ilang mga isyu. Sa gayon, ang inilabas na bagong Pulse Asia survey tungkol sa mga hinaing ng mga Pilipino, ay kailangang pag-aralang mabuti ng ating mga opisyal na ngayon ay abala sa pag-iisip at pagbuo ng mga plano para sa ating bansa.

Sa inilabas na ‘Ulat sa bayan’ survey na isinagawa noong Marso 23-28, ipinakita rito ang mga pangunahing hinaing ng mga Pilipino ngayon; ang pagtaas ng sahod (inilista ng 50 porsiyento ng mga respondent), kasunod ng mataas na presyo ng mga bilihin (45%), mapababa ang kahirapan (35%), at paglikha ng mas maraming trabaho (32%). Lahat ito ay may kinalaman sa ekonomiya. Sinasabi ng mga tao na nais nila ng mas maayos na buhay na may mas malaking kita. Nais din nila ng mas maraming trabaho na malapit sa kanila.

Sumunod sa mga hinaing sa survey ang paglaban sa krimen (27%) at kurapsiyon (22%), pagsulong ng kapayapaan (22%), pagbawas ng buwis (15%), proteksiyon sa mga overseas Filipino workers (13%), pag-iral ng batas (10%), at pagprotekta sa kapaligiran (10%).

Huli naman sa listahan sa survey ang pagkontrol sa populasyon (7%), pagtanggol sa teritoryo (6%), terorismo (4%) at ang Charger Change (3%).

Isang bahagi ng survey ang nagpapakita na ikinalugod ng mga mamamayan ang mabilis na pagresponde ng administrasyong Duterte sa panahon ng kalamidad (86%), proteksiyon sa OFWs (84%), at paglaban sa kriminalidad (81%). Inilalarawan ng mataas na bilang na ito ang mataas na antas ng pagkilala ng mga Pilipino sa kasalukuyang pagsisikap ng Pangulo at ng kanyang mga opisyal.

Subalit kasabay ng mataas na pagkilala sa mga pagsisikap ng pamahalaan, kailangang mas pagtuunan ng pansin ng mga opisyal ang apat na pangunahing hinaing ng mga Pilipino sa survey- sahod, presyo, kahirapan, at trabaho.

Ang programang pang-imprastruktura na “Build, Build, Build” ay tiyak na lilikha ng mas maraming trabaho at makatutulong upang maibaba ang antas ng kahirapan sa bansa. Mayroon ding mga nakaugnay sa ekonomiya na mga programa upang suportahan at dagdagan ang building program-ang planting program sa agrikultura, halimbawa, programang malawakang paglikha ng trabaho kasama ang mga pribadong kumpanya, at iba pa.

Ipinahayag na ng mga mamamayan ang kanilang mga hinaing sa pamamagitan ng Pulse Asia Survey. Habang abala ang pamahalaan sa paglaban sa ilegal na droga at pagsulong ng charter change, nararapat na mas pagtuunan ng administrasyon ang mga programa na makatutulong sa mga hinaing ng mga Pilipino sa sahod, presyo, at trabaho.