‘Doctor Crush,’ bagong koreanovela sa Dos

MAKAKAYA bang gamutin ng pagmamahal ang sugatang puso? Patutunayan ng pinakabagong koreanovelang Doctor Crush na ipapalabas ng ABS-CBN na pagibig ang pinakaepektibong lunas sa karamdaman at mapapanood na ang nakakakilig na kuwento nito sa primetime ngayong gabi.

Pinagbibidahan ng tatlo sa pinakamalalaking Korean stars na sina Kim Rae Won, Lee SungKyung at Park Shin Hye, tampok sa serye ang isang delingkwenteng dalaga na kalaunan ay naging doctor na nililigawan ng kanyang dating high school teacher at ngayon ay kasamahan sa ospital.

Dahil sa pinagdaanan sa buhay at pamilya ay lumaking matatag at palaban si Giselle. Hirap siyang magtiwala sa tao at tanging ang kanyang pinakamamahal na lola ang pinagkakatiwalaan niya.

Makikilala niya ang kanyang Biology professor na si Nico na maglalaan ng oras at atensiyon para maituwid sa tamang landas si Giselle. Dumanas din ng hirap si Nico bilang teenager kaya masidhi ang hangatin niyang makatulong sa high school students na may pinagdadaanan din tulad ni Giselle.

Maayos ang pakikitungo nila sa isa’t isa bilang magkaibigan hanggang kumalat ang tsismis na may namamagitan sa kanila. Kokomprontahin ni Giselle si Sherry, ang pinaghihinalaang nagkakalat ng tsismis, at mauuwi ang kanilang paghaharap sa pagkakasunog ng bahagi ng isang gusali.

Paano niya matatakasan ang gusot na ito? Ano ang gagawin ng kanyang lola para mapigilan ang kasong arson na isasampa laban sa kanya? Ano ang magiging reaksiyon ni Giselle kapag malaman na ama ni Sherry ang doctor na oopera sa kanyang lola? Ano ang mangyayari kapag nagkita sina Giselle at Nico pagkatapos ng 13 taon? May kalayaan na ba silang mahalin ang isa’t isa?

Huwag palalampasin ang Doctor Crush, simula ngayong gabi na pagkatapos ng Since I Found You.