Justice de Castro nominado bilang Ombudsman

Nominado si Supreme Court (SC) Justice Teresita J. Leonardo de Castro para maging kapalit ni Ombudsman Conchita Carpio Morales, na magreretiro sa Hulyo ngayong taon matapos makumpleto ang kanyang term of office.

Si Justice De Castro, magreretiro na rin sa Oktubre sa pagtuntong niya sa retirement age na 70 at nakumpleto ang 45 taon sa government service, ay ninomina ni retired SC Justice Arturo D. Brion.

Pinalawig ng JBC, ang nominasyon para sa puwesto ng Ombudsman ay hanggang sa Mayo 15.

Sa kanyang letter of nomination, sinabi ni Brion na sa loob ng mahigit apat na dekada, si Justice De Castro “has served the government with competence, probity and integrity.”

“Her long years in the prosecutorial service (almost 19 years) and in the Sandiganbayan (more than 10 years), not to mention her more than a decade of experience as an associate justice of the Supreme Court qualify her for the position of Ombudsman,” diin ni Brion.

Binanggit din niya ang maraming parangal na natanggap ni De Castro. Kabilang sa mga ito ang Presidential Medal of Merit noong 1998, para sa pagsisilbi nito bilang isa sa peace negotiators sa panahon ng namayapang si dating Pangulong Corazon Aquino at ni dating Pangulong Fidel Ramos, at ang Chief Justice Hilario Davide, Jr. Reform Award para sa mga reporma na ipinatupad nito sa Sandiganbayan.

Nahalal si De Castro bilang presidente ng International Association of Women Judges at nagsilbi ng isang termino mula sa 2012 hanggang 2014.

Bago ang maitalaga sa SC, si De Castro ay naging presiding justice ng Sandiganbayan, ang anti-graft court ng bansa.