Pagpatay sa piskal, job-related?

Posibleng may kinalaman sa trabaho ang pagpatay sa deputy city prosecutor sa Quezon City noong Martes, ayon sa Quezon City Police official.

Ayon kay Quezon City Police District director Chief Superintendent Joselito Esquivel, Jr., sinisilip na nila ang anggulong may kinalaman ang insidente sa trabaho ng biktima bilang fiscal.

Nitong Biyernes ng hapon, ang biktima, kinilalang si Rogelio Velasco, 64, assistant city prosecutor, ang tinambangan ng isang grupo ng kalalakihan habang nagmamaneho pauwi sa kahabaan ng Holy Spirit Drive sa Barangay Holy Spirit, Quezon City.

Sa inisyal na imbestigasyon, minamaneho ni Velasco ang pulang Toyota Innova, kasama ang kanyang anak na babae, nang sumulpot ang isang puting Toyota Innova (NXR-256) at hinarang ang daraanan ng biktima.

Nasa apat na armado ang bumaba sa putting sasakyan at pinaputukan si Velasco.

Bumaba ang anak ng biktima mula sa kanilang sasakyan at sinubukang habulin ang papatakas na mga armado ngunit isa sa mga ito ang tinutukan siya ng baril kaya napilitang magtago.

Agad sumakay ang mga suspek sa kotse at humarurot patungo sa Commonwealth Avenue.

Humingi ng tulong ang anak ni Velasco sa dumating na transport network vehicle services driver at isinugod ang biktima sa East Avenue Medical Center kung saan siya idineklarang dead on arrival.

Aabot sa 20 butas dahil sa bala ang tinamo ng sasakyan ni Velasco, ayon sa awtoridad. Ilang basyo at mga case folders ang narekober sa loob ng sasakyan ng biktima.

Matapos ang pag-atake, sinabi ni Esquivel na bumuo sila ng special investigation task group upang matukoy ang pagkakakilanlan ng mga suspek.