Gulugod ng bansa
PALIBHASA’Y mistulang naging kaulayaw ang mga kalabaw sa panahon ng aming pagsasaka, hindi ko maaaring palampasin ang buwan ng Mayo nang hindi pinararangalan ang mga magbubukid. Ngayon ipinagdiriwang ang kapistahan ni San Isidro de Labrador – ang patron ng mga magsasaka; kaakibat nito ang pagpapahalaga sa mga kalabaw – ang pangunahing katuwang ng mga magbubukid nang hindi pa sumasayad sa ating mga bukirin ang makabagong paraan ng pagsasaka na ginagamitan ng mga modernong makina.
Nakatutuwang mabatid na sa kabila ng naturang makabagong sistema ngayon ng pagsasaka, lalong pinaiigting ng administrasyon ang pag- ayuda sa mga magbubukid sapagkat napatunayan nila na ang grupong ito ng mga manggagawa ang susi sa pagkakaroon ng sapat na produksiyon – palay, mais at iba pang produktong pangagrikultura.
Lalong nakagagalak malaman ang matibay na determinasyon ng Department of Agrarian Reform ( DAR) na palawakin ang sakop ng Comprehensive Agrarian Reform Program ( CARP). Tama lamang na hilingin sa Kongreso ng naturang ahensiya na magpatibay ng batas tungkol sa CARP extension upang mabigyan ng lupa ang mga magsasaka na walang sariling lupa. Naniniwala ako na ang naturang panukala ay marapat lamang sertipikahan ng Malacañang bilang ‘ urgent measure’.
Sa ilalim ng pagtitibaying batas, sasakupin ng CARP extension ang mga pribadong lupain na wala pang notice of coverage ( NOC). Sa gayon, ang naturang mga pribadong lupain na ngayon ay umaabot pa sa 500,000 ektarya ay maipamamahagi sa ating mga magbubukid upang ito ay pagyamanin tungo sa pagkakaroon ng sapat na ani.
Hindi ko matiyak kung ang Hacienda Luisita ay masasakop pa ng CARP extension law. Kung hindi ako nagkakamali, may desisyon na ang Supreme Court na ipamahagi sa mga magsasaka ang ilang bahagi ng naturang malawak na hacienda.
Puwede rin kayang masakop ng pagtitibaying batas ang mga pribadong lupain na pagaari naman ng mga Simbahang Katoliko? Sinasabing milyunmilyong ektarya rin ang pag- aari ng iba’t iba pang mga religious organizations na tiyak na mapagaanihan nang sapat kung ang mga ito ay maipamamahagi sa mga magsasaka.
Sa matinding pagpapahalaga ng administrasyon sa mga magsasaka, tandisang ipinahiwatig ni Pangulong Duterte na ipasasakop niya sa land reform law ang Boracay island pagkatapos ng rehabilitasyon nito. Ibig sabihin, ibabalik niya sa mga katutubo ang naturang isla upang pagyamanin ng mga magbubukid. Naniniwala ako na ang mga katutubo ang dapat makinabang at maghari sa naturang lugar at hindi ang masasalaping negosyante.
Dapat lamang pag- ukulan ng natatanging pagpapahalaga ang mga magsasaka sa lahat ng pagkakataon sapagkat sila ang tinuturing na bakbone of the nation – gulugod ng bansa na susi sa inaasam nating rice self- sufficiency o sapat na pagkain para sa ating lahat.