R300M tinangay sa 60 jobseekers
Tumataginting na P300 milyong halaga ng placement fee ang tinangay ng dalawa umanong illegal recruiter mula sa 60 job seekers.
Tinutugis ng Manila Police District (MPD) ang mga suspek na sina Yvette Valdez, ng Batanes Street, Sampaloc; at Analyn Robiaz, na kapwa nagpakilalang empleyado ng RYVT Travel Tour and Services, na matatagpuan sa 2005 España Boulevard, sa Sampaloc.
Inireklamo sina Valdez at Robiaz ng Syndicated Large Scale Illegal Recruitment at Syndicated Large Scale Estafa ng 60 job seekers, pawang ‘di pinangalanan, sa tanggapan ng Station Investigation and Detective Management Branch ng MPD-Station 4 kamakalawa.
Ayon kay PO1 Danilo P. Kabigting, sa reklamo ng mga biktima ay lumilitaw na ilang buwan bago ang transaksiyon ay una nilang nakilala si Robiaz, sa rekomendasyon ng isa ring complainant.
Kinumbinse umano ni Robiaz ang mga biktima na mag-apply bilang dairy farmers sa New Zealand, at dahil malaki ang pasahod na alok nito ay madali umanong napapayag ang mga biktima.
Napag-alaman na galing sa iba’t ibang lalawigan ang mga biktima at nagtungo lamang sa Maynila upang mag-apply ng trabaho.
Ipinakilala ni Robiaz si Valdez sa mga biktima bilang ka-partner sa agency.
Siningil umano ng mga suspek ang mga biktima ng tigP300,000 na placement fee, upang makapagtrabaho bilang dairy farmers sa New Zealand.
Naganap umano ang bayaran sa bahay ni Valdez sa Sampaloc, kung saan pansamantalang pinatuloy ng mga suspek ang ibang biktima upang kunin ang tiwala ng mga ito. Gayunman, nang makumpleto na ng mga biktima ang placement fee ay naglahong parang bula ang mga suspek at hindi na nila matawagan.
Ayon sa mga biktima, huli nilang nakausap ang mga suspek noong nakaraang linggo para sa huling briefing bago ang kanilang biyahe, ngunit hindi sila nakaalis sa bansa.
Dahil hindi na nila matawagan sina Robiaz at Valdez, nagdesisyon ang mga biktima na magreklamo sa awtoridad.
Ayon naman kay Kabigting, sa ginawa nilang beripikasyon sa tanggapan ng Philippine Overseas Employment Administration (POEA), lumilitaw na peke ang RYVT Travel Tour and Services at sina Valdez at Robiaz ay hindi awtorisadong recruiter.
Natuklasan din ni Kabigting kinasuhan na ang mga suspek ng illegal recruitment noong Pebrero matapos mambiktima ng limang job seekers mula sa iba’t ibang lalawigan.