Cariño kampeon sa Le Tour
BAGUIO CITY – Pangatlo lamang na nakatawid sa finish line si El Joshua Cariño ng NavyStandard Insurance sa final stage, ngunit sapat na ito para makopo ang korona kahapon sa 2018 Le Tour de Filipinas.
May tatlong segundong agwat mula sa pumapangalawa sa kanya sa individual classification ang nakababatang kapatid na si Daniel Ven ng 7-Eleven Cliqq Roadbike Philippines bago magsimula ang 4th stage kahapon, hindi nagpabaya si Cariño at nanatiling nakaagapay sa mga nagbantang umalpas kahapon paakyat ng Baguio upang tanghaling ikatlong Filipino rider na nagtagumpay sa Le Tour de Filipinas.
Tinapos ng tubong Mangaldan, Pangasinan ang karera na may distansiyang 154.65 kilometro na nagsimula sa Lingayen paakyat sa Burnham Park sa tiyempong 4: 07.54 -- dalawang minuto at dalawang segundo ang agwat sa stage winner na si Eritrean Metkel Eyob ng Terrenganu Cycling Team ng Malaysia na nakatawid sa finish line sa tiyempong 4:05:52.
“Nung andun ako, iba na yung padyak ko eh. Bawat padyak, may kaba talaga, kasi ayoko rin naman ipahiya yung mga Filipino na umaasa,” pahayag ni Carino.
”Hanggang ngayon di parin ako makapaniwala,” dagdag nito
Nagtala ng 1- 2 finish ang magkakamping sina Eyob at Australian na si Drew Morey sa final stage sa pagtatangkang agawin ang yellow jersey kay Cariño, ngunit hindi nagpabaya ang Pinoy rider partikular sa bahaging akyatin sa pagsuporta na rin ng kanyang mga kakampi at kapwa Pinoy riders.
Ang 25-anyos na si Cariño ang ikatlong Filipino rider kasunod nina Baler Ravina noong 2012 at Mark John Lexer Galedo noong 2014 na nagkampeon sa UCI sanctioned race.
Nalaglag at nakatawid na pang20 kahapon, tumapos si Daniel Ven na pampito sa overall individual classification at naging konsolasyon niya ang pagtatapos bilang Best Young Rider.
Bukod sa magkapatid, ang iba pang mga Pinoy riders na nakapasok sa top 10 ay sina Stage 2 winner Ronald Oranza ng Navy na siyang pumangatlo kasunod ng sumegundang si Eyob, ang kanilang kapitan na si Jan Paul Morales na pumang-apat,, ang mga 7 Eleven riders na sina Galedo at Felipe na pumang-anim at pumangwalo at si Go for Gold rider Ismael Grospe na pumang-siyam.
Nagawa namang panatilihin ng Navy at 7-Eleven ang kanilang 1- 2 puwesto sa team general classification sa pagtatapos ng karerang inorganisa ng Ube Media at sanctioned din ng PhilCycling sa ilalim ni Congressman Bambol Tolentino at chairman Bert Lina, sa pakikipagtulungan ng Air21 at Cargohaus Inc.
Samantala, bukod sa pagiging kampeon, si Cariño rin ang nagwaging Best Filipino rider at Best Sprinter habang si Eyob naman ang Best Climber.