Eligibility para sa SK officials, target

Target na bigyan ng Barangay Official Eligibility ( BOE), na katumbas ng basic civil service eligibility, ang mga halal at itinalagang kagawad ng Sangguniang Kabataan Barangay, na nakumpleto ang paglilingkod nila sa tungkulin.

Ayon kay Albay Rep. Joey Sarte Salceda, na may-akda ng House Bill 7719, ang BOE para sa kuwalipikadong mga opisyal ng SK ay “ituturing na sapat na kuwalipikasyon” para makapagtrabaho sa gobyerno.

Sinabi ng kongresista na layunin ng panukala na isulong at pagtibayin ang pakikibahagi ng kabataan sa pagtatatag ng matibay at maunlad na bansa, itanim at palaguin sa puso at diwa nila ang tamang moralidad at pagiging tapat, makabayan, makatao.

Aamyendahan ng panukala ang ilang probisyon ng Local Government Code of 1991 (RA 7160) para maisali sa programang BOE ang mga kagawad ng SK.