Task force para sa Oplan Balik Eskwela 2018
Upang masiguro ang maayos na pagbubukas ng klase para sa taong 2018-2019 sa darating na Hunyo 4, nakipagpulong ang Department of Education (DepEd) sa ilang ahensya, institusyon at mga stakeholders upang bumuo ng Inter-Agency Task Force (IATF) para sa Oplan Balik Eskwela (OBE) 2018.
“We would like to thank our partner agencies in the government because this is not just the undertaking of the Department, this is the undertaking of the entire community of Filipinos who is interested in, and advocates quality education,” pahayag ni Education Secretary Leonor Briones bilang pasasalamat sa mga miyembro ng OBE-IATF.
ACTIVE PARTICIPATION
Kaugnay nito, siniguro ng Manila Electric Company (MERALCO) ang pagiinspeksiyon ng mga electrical facilities ng mga paaralan upang matiyak na ang electrical wiring safety standard, pagtatabas ng mga puno malapit sa mga electrical wires ng paaralan at ang pamamahagi ng “Safe ang School Ko” forms na magsisilbing basehan kung nasa maayos na kondisyon ang mga electrical wiring sa mga paaralan. Sa kasalukuyan, tinatayang nasa 2,628 paaralan na ang nainspeksyon ng Meralco.
Bilang bahagi ng OBE-IATF, nangako naman ang Philippine National Police (PNP) na magtatalaga ang ahensiya ng 28,000 kawani upang “assure the safety and security of students, teachers, parents, and school personnel nationwide especially during the resumption of classes.” Nakahanda na rin umano ang “Oplan Bisita Eskwela” ng PNP na layuning makipagtulungan sa mga paaralan para sa anti-bullying at antiillegal drug campaigns.
Samantala, inilunsad naman ng Department of Trade and Industry (DTI) ang programa nitong “Oplan Balik Eskwela Diskwento Caravan” sa pakikipagtulungan sa mga gumagawa at nagbebenta ng mga school supplies upang magbigay sa mga “consumers access to basic goods, school supplies, and prime commodities at discounted prices.”
Para naman masiguro na malusog ang mga estudyante at nasa maayos na kondisyon ang mga paaralan, layunin naman ng Department of Health (DoH) na mabawasan ang ‘child morbidity and mortality’ upang makamtan ang global health well-being, gender equality, at malinis na tubig at sanitasyon. Siniguro rin ng DoH ang regular na monitoring sa mga kaso ng Dengvaxia, sa pamamagitan ng 24/7 hotline ng ahensiya.
Iniulat naman ng Philippine Atmospheric, Geophysical and Astronomical Services Administration (PAGASA) ang inaasahang lagay ng panahon sa huling linggo ng Mayo at unang lingo ng Hunyo sa pagbubukas ng klase. Pinaalalahanan din ng PAGASA ang publiko mula sa “flood-prone areas en route to school for flashfloods occurrence due to thunderstorms, and to watch out for lightning strike.”