Kumolekta ng R148M ala-‘Ponzi’, arestado

Hinarap ng babaeng scammer, na umano’y nakakulimbat ng mahigit P148 milyon, ang mga galit na investor na nabiktima ng kanya umanong “Ponzi” scheme, nang iprisinta siya ng Philippine National Police (PNP) sa mga ito sa Camp Crame sa Quezon City kahapon.

Dinakma ang suspek, na kinilalang si Margarita Huang, nasa hustong edad, ng mga tauhan ng Criminal Investigation and Detection GroupAnti-Fraud and Commercial Crimes Unit (CIDG-AFCCU), nitong Huwebes, Mayo 24, sa isang condominium tower sa Barangay Santo Cristo, Quezon City.

Inihayag ni PNP chief Director General Oscar Albayalde na si Huang, na pangunahing suspek sa syndicated estafa na hawak ng CIDG, ay akusado sa 12 magkakahiwalay na kasong kriminal, na isinampa sa Quezon City Regional Trial Court (RTC) Branches 40 at 85, at sa Makati City RTC Branch 148, kung saan nahaharap ang suspek sa outstanding warrants of arrest na inisyu ng tatlong korte.

Ayon kay Albayalde, nagsangay ang kaso mula sa tinatayang 423 bouncing checks na inisyu umano ni Huang at ng kanyang asawang si Gary, sa 29 na investor, sa umano’y money-lending business ng pamilya noong 2015.

Sa imbestigasyon, hihikayatin umano ng mga suspek ang kanilang mga biktima na magpautang ng P250,000, kapalit ng pangakong maibabalik ang pera nang may apat hanggang 15 porsiyentong investment rate kada buwan.

Ang modus na ito ay tinawag na Ponzi scheme, na isinunod sa apelyido ng high-profile swindler sa Italy noong 1800s.

Binanggit din ni Albayalde na P130.5 milyon umano ang halaga ng mga tumalbog na tseke, ngunit inulat ng Securities and Exchange Commission (SEC), na maaaring umabot sa P148 milyon ang halaga ng tsekeng inisyu ng mga suspek sa 46 na biktima.