Ika-31 labas

ILANG araw na ang nakalipas, laman pa ng isip ni Tandang Goring ang paksang pinag-usapan nila ng kababata at matalik na kaibigang si Tandang Egle nang uminom sila ng alak na barikolkol sa tindahan niya sa sentro ng barangay. Ang paksa nilang pinag-usapan ay ang pagbubuntis ni Erlinda na tinatawag nilang Klaret at ng kanilang mga kabarangay dahil may diperensya sa pagiisip. Dahil likas na mahilig sa tsismis, buhay pa kay Tandang Goring ang masidhing pagnanais malaman kung sino ang ama ng ipinagbubuntis ng dalagang may diperensya sa pag-iisip. Tiyak niya, malaking iskandalo sa barangay ang pagputok ng balitang buntis si Klaret at karangalan sa kanya kung siya ang unang makakaalam sa ama ng sanggol. Kaya tulad ng kababata at matalik na kaibigang si Tandang Egle, may pinaghihinalaan si Tandang Goring kung sino ang ama ng ipinagbubuntis ng dalagang may diperensya sa pag-iisip.

“Malamang isa sa mga binatang mahilig uminom dito sa tindahan ko ang ama,” wika ni Tandang Goring. “Alam mo naman ang lalaki kapag nasa impluwensya ng alak, paldahan lang ang poste, tataluhin na!”

Lihim na nakadama ng malaking kasiyahan si Tandang Goring nang makita ang apat na binatang mahilig uminom na papunta sa kanyang tindahan. Nakadama siya ng malaking kaligayahan dahil bukod sa mabebenta ang paninda niyang alak na barikolkol, sigarilyo at tsitserya, magkakaroon siya ng pagkakataong marinig ang paguusap ng mga binatang iinom. Malaki ang paniniwala ni Tandang Goring na kapag nasa impluwensya na ng alak ang mga binata, bukod sa malakas ang boses sa paguusap, malaki ang pagkakataong masabi ang nakatagong lihim na ginawa o nangyari.

“Mukhang naligaw na naman kayo sa tindahan ko?” Tanong ni Tandang Goring sa apat na binatang nasa tapat ng kaniyang tindahan.

“Hindi ho kami naligaw, Tandang Goring,” sagot ng isang binata. “Dito talaga kami papunta sa tindahan mo, babalatuhan ka namin sa kinita namin sa pagbebenta ng uling!”

“Salamat naman at kikita ako sa inyo,” sagot ni Tandang Goring. “Akala ko masesero ang tindahan ko sa mga manginginom. Lalabasan ko na ba kayo ng isang medya?”

“Hindi ho medyahang bote ang ilalabas ninyo,” wika ng isa pang binata. “Long neck, dahil kung medya, ilang ikot lang, wala ng laman kaya kukuha na naman kayo!”

“Tama nga ho, Tandang Goring,” wika ng isa pang binata. “Long neck para matagal ang ikot sa inuman!”

“At sana ho, ‘yung matagal ninyong imbak ang ilabas sa amin,” pakiusap ng ikaapat na binata. “’Yun ang magandang inumin dahil kagat na kagat ang lasa!”

“Huwag kayong mag-alaala,” wika ni Tandang Goring. “Lahat ng Barikolkol na tinda ko, matagal na imbak kaya hindi kayo malulugi sa perang ibibili!”

“Sige ho, dalawang long neck na ang ilabas ninyo para hindi na kayo uli maglabas,” sagot ng binatang unang nagsalita. “At saka samahan n’yo ng isang supot na tsitseryang lagi naming pinupulutan!”

“Huwag kayong mag-alaala, magandang serbisyo ang ibibigay ko sa inyo,” pabirong wika ni Tandang Goring.

Si Carl, Luvimin, Lyndon at Dandoy ang mga binatang dumating sa tindahan ni Tandang Goring para uminom ng alak na barikolkol. Mga binatang isinilang at lumaki sa Bgy. Bayan-bayan na piniling doon umikot ang buhay. Nakatapos sila ng high school ngunit dahil walang hilig mag-aral, hindi na nag-aral sa kolehiyo. Dahil may niyugan at bukid na pag-aari ang pamilya, tumulong na lang sila sa pagtatrabaho habang hindi nagkakaroon ng sariling pamilya.

Madalas, kapag nagka-asawa, nagmumula ang kabuhayan ng mabubuong pamilya sa niyugan at bukid ng dalawang pamilyang nagbigkis. Dahil hindi puwedeng gastusin sa kung-anu-anong bagay o okasyon ang kita ng niyugan at sakahing bukid ng pamilya, gumagawa ng paraan ang mga binata para magkaroon ng ekstrang kita tulad ng paguuling ng kahoy sa bulas at natitirang gubat sa barangay.

Itutuloy...