466 na tambay pinagdadampot

Nasa 466 na tambay sa Metro Manila, partikular na sa Maynila, Las Piñas, at Quezon City, ang nalambat sa Simultaneous Anti-Criminality Law Enforcement Operation (SACLEO) sa nakalipas na 24-oras.

Agad binitbit ng awtoridad ang mga tambay, karamihan ay nakahubad-baro at nag-iinuman at naninigarilyo sa kalsada, sa presinto dahil sa paglabag sa mga ipinatutupad na ordinansa Maynila.

Lima sa mga naaresto ay nahulihan ng limang pakete ng hinihinalang shabu, na nagkakahalaga ng halos P5,000, at sasampahan ng kasong paglabag sa Republic Act 9165 o Comprehensive Dangerous Drugs Act of 2002.

Samantala, ang mga lumabag sa ordinansa ay nakatakdang isailalim sa inquest proceedings, habang ang ilan sa mga dinampot ay pinauwi rin matapos isailalim sa verification at magnegatibo sa anumang criminal record.

Nasagip naman ng mga pulis ang 26 na menor de edad na naabutang pagala-gala pa sa lansangan sa kabila ng curfew.

Dinala ang mga kabataan sa tanggapan ng Department of Social Welfare and Development at ipinasundo sa kani-kanilang magulang.

Isinailalim naman sa beripikasyon at dokumentasyon ang mga lumabag sa ordinansa, pinagmulta bago pinakawalan.

Samantala, nasa 322 tambay naman ang dinampot sa Quezon City sa kahalintulad ng kampanya laban sa kriminalidad.

Nasamsaman ang hindi pa mabatid na halaga ng droga at mga patalim sa mga inaresto na karamihan ay nakatambay sa mga kalsada sa lungsod.