Tandem todas, isa nakatakas

Kaagad na binawian ng buhay ang dalawa sa tatlong hindi nakilalang lalaki na sakay sa motorsiklo makaraang makipagbarilan sa mga pulis sa Oplan Sita sa Muntinlupa City, kahapon ng madaling araw.

Inaalam pa ng awtoridad ang pagkakakilanlan ng dalawang napatay na suspek, kapwa nasa hustong gulang, na nagtamo ng ilang tama ng bala sa iba’t ibang bahagi ng katawan.

Patuloy naman ang ikinakasang pursuit operation ng pulisya laban sa isang kasamahan ng mga ito na nakatakas.

Sa ulat na ipinarating ng Southern Police District (SPD), nangyari ang engkuwentro sa Ylaya Carzo Street sa Barangay Alabang sa Muntinlupa City, dakong 2:45 ng umaga.

Bago ang insidente, nagsasagawa ng Oplan Sita ang Police Community Precinct (PCP)-2 sa National Road sa Bgy. Bayanan nang bigla umano silang iwasan ng tatlong suspek, na sakay sa isang motorsiklo.

Pagkaraan ay isa sa mga salarin ang bumunot ng baril at pinutukan umano ang mga pulis. Tiyempo namang nagpapatrulya ang mga tauhan ng Tactical Management Response Unit (TMRU) sa lugar kaya mabilis na nagkasa ng dragnet operation laban sa mga papatakas na suspek.

Namataan ng awtoridad ang dalawa sa mga suspek na tumakbo sa Ylaya Carzo St., sa Alabang, kaya sinundan nila ito na humantong sa engkuwentro at agarang pagkamatay ng mga salarin.

Narekober umano sa dalawang suspek ang isang .9mm caliber pistol at isang homemade shotgun (sumpak).

Nagsasagawa na ng pagsisiyasat hinggil sa pagkakakilanlan ng dalawang suspek at ang posibleng krimen na kinasasangkutan ng mga ito sa Muntinlupa.