Foton, liyamado sa PSL Invitational

Mga Laro sa Sabado (Smart Araneta Coliseum) 3:00 n.h. -- Opening ceremonies 4:00 n.h. -- Generika-Ayala vs UA-UP 5:00 n.h. -- Foton vs F2 Logistics

LIYAMADONG malinaw ang Foton sa paglarga ng Chooks to Go- Philippine Superliga (PSL) Invitational Conference sa Sabado sa Smart Araneta Coliseum.

Higit na lumakas ang lineup ng Foton nang makuha ang serbisyo ni Ateneo de Manila University superstar Bea de Leon, sapat para bansagan ang Tornadoes na ‘team to beat’ sa torneo na itinataguyod ng Isuzu, SOGO Hotel, at UCPB Gen, sa pakikipagtulungan ng ESPN5, Hyper HD at Aksyon TV.

Ayon kay Foton team owner Rommel Sytin, ang pagdating ng 5-foot-11 na si De Leon ay nagpatatag sa dati nang matibay na frontline na binubuo nina 6-foot-5 Jaja Santiago at 6-foot-1 Dindin Manabat, gayundin ang mga national pool members na sina Maika Ortiz, CJ Rosario at Gen Casugod.

Bukod kay de Leon, naidagdag din sa Tornadoes si University of the East star Shaya Adorador.

“As the league becomes competitive, we’ll see how our ‘ Triple Tower’ of Bea, Dindin and Jaja can blend together to give us our first ever Invitationals championship,” pahayag ni Sytin, pangulo ng Foton Motor Philippines, Inc.

“They’ve all played together and chemistry will not be a problem. Although this is their first time to play together after college, their partnership will surely bring a lot of excitement to PSL fans,” aniya.