Collegiate Awards sa Bayleaf
KIKILALANIN ang galing ng manlalaro mula sa dalawang malaking collegiate league – NCAA at UAAP – sa gaganaping Chooksto- Go Collegiate Basketball Awards ngayon sa The Bayleaf Hotel sa Intramuros.
Ihahayag ng mga miyembro ng UAAP at NCAA Press Corps ang kanilang napiling mga magiging miyembro ng Mythical Team.
Pinangungunahan nina Robert Bolick at Thirdy Ravena, mga nanguna sa championship ng San Beda at Ateneo, ayon sa pagkakasunod, ang selection na kinabibilangan nina NCAA MVP CJ Perez ng Lyceum, Ben Mbala ng La Salle at Matt Nieto ng Ateneo.
Matapos pangunahan ang Red Lions sa kanilang 21st title sa NCAA, karapat-dapat si Bolick na mapabilang sa mythical team .
Hindi nakakuha ng individual award ang 6’1 guard sa nakaraang NCAA bunsod ng suspensyon na ipinataw sa kanya.
Napabilang naman ang Ateneo homegrown pair nina Ravena at Nieto sa mga pararangalan sa awards ceremony na suportado ng The Bayleaf Intramuros at Cherrylume makaraang giyahan ang Blue Eagles sa kampeonato.
Si Perez naman ay hindi maitatatwang nasa likod ng matinding pagbabago sa Pirates mula sa pagiging cellar dweller hanggang sa championship contender matapos magtala ng historic elimination round sweep.
Hindi naman nakapagtatakang mapabilang sa selection si Mbala, dahil sa isa na namang dominant season para sa Green Archers.
Mula sa limang manlalarong nabanggit hihirangin ang pararangalan bilang Collegiate Player of the Year.