Hepe, 3 tauhan sibak sa pagkamatay ng tambay

Apat pang pulis-Quezon City, kabilang ang isang opisyal nito, ang sinibak sa kanilang puwesto kaugnay ng pagkasawi ni Genesis “Tisoy” Argoncillo, kamakailan.

Kabilang sa sinibak ni Quezon City Police District (QCPD) director, Chief Supt. Joselito Esquivel, sina precinct commander Senior Insp. Cyrill Dagusen, PO1 Ruel tubat, PO1 Paulo Lopez, Jr. at PO1 Paul Hector Calderon, sa Novaliches police station.

Sa isang press conference sa Quezon City, ipinatupad ni Esquivel ang pagsibak sa apat dahil sila ang nasa likod ng pag-aresto kay Argoncillo sa reklamong alarm and scandal.

Pansamantala inilipat ang mga ito sa District Headquarters Support Unit (DHSU) sa QCPD Headquarters hanggat hindi pa natatapos ang imbestigasyon sa kanilang kaso.

Aniya, nagsagawa na rin sila ng pre-charge evaluation laban sa apat na pulis upang madetermina kung may pananagutan sila sa kasong administratibo sa pagkakadakip kay Argoncillo.

Nitong nakaraang linggo, sinibak na rin ni Esquivel si Novaliches Police Station commander, Supt. Carlito Grijaldo at sina duty jailer PO3 Dennis Saño, Desk Officer SPO3 Ronald Nañola, Staff Duty Officer (SDO) Inspector Oliver Dela Cruz, at Shift Patrol Supervisor (SPS) SPO4 Valerio Perez.

Matatandaang binawian ng buhay si Argoncillo matapos magreklamo na nahihirapang huminga noong umaga ng Hunyo 19.

Sa autopsy, natuklasan na binugbog si Argoncillo habang siya ay nasa loob ng kulungan at binawian ng buhay dahil sa pagnanakal, pinsala sa ulo, dibdib at iba pang bahagi ng kanyang katawan.