Alden, ‘di nakakahindi sa fans
ISA si Alden Richards sa mga artistang hindi namimili ng fans na lalapitan o gustong magpa-picture sa kanya. Pero nitong weekend ay dalawang fans ang pinasaya niya.
Naimbita si Alden sa opening ng biggest mall sa south, ang Megaworld Festive Walk Iloilo, last June 30, kasama ang iba pang celebrities. Pagdating pa lang niya sa Iloilo International Airport ay may lumapit na kaagad sa kanya, na kung puwede raw siyang ma-meet ng isang senior citizen na matiyagang naghihintay sa kanyang pagdating, dahil paborito nito ang Pambansang Bae.
Kaya naman sa halip na dumiretso sa hotel, pinuntahan muna ni Alden si Lola
Fabiola Paderes. Kagagaling lang ni Lola sa operation at naibsan daw ang iniindang sakit ng matanda nang mayakap si Alden.
Malapit talaga sa puso ni Alden ang mga lolo at lola, dahil kasama niya sa bahay ang lolo at lola niya. Last Sunday naman, after ng Sunday
PinaSaya ay hindi rin niya tinanggihan ang imbitasyon ng Kapuso Mo Jessica Soho para mameet ang fan niyang si Angelica Canubida.
Ayon kay Jessica Soho, inspirasyon daw ni Angelica si Alden para labanan ang nararamdamang lungkot dahil sa nangyari rito. Maganda si Angelica pero may diperensiya siya sa kaliwang pisngi, na lumaylay na at inabot na ng kalahating kilo ang bigat nito.
Gayunman, hindi ito nakapigil kay Angelica, na sa kabila ng kanyang kalagayan ay nakapagtapos ng hotel and restaurant management. Humihingi siya ngayon ng tulong para maoperahan ang kanyang pisngi upang makapagtrabaho siya.
Ang saya ni Angelica nang ma-meet niya
ang paborito niyang actor-singer sa Studio 7 ng GMA, na naghintay sa pagdating niya since galing pa siya ng Davao. Sabi ni Angelica, guwapo na raw si Alden sa picture, pero mas guwapo raw sa personal ang binata. Pinayuhan pa siya ni Alden na lakasan ang kanyang loob, dahil kasama na sa buhay ang pagtatagumpay sa gitnang mga pagsubok. Maraming nag- offer ng tulong kay Angelica, na malaki ang mgagastos dahil tatlong beses siyang dapat maoperahan bago tuluyang maayos ang kanyang pisngi.