‘Jurassic World 2’, ‘di natinag sa Top 1

SA taya ng mga studio nitong Linggo, tumabo ang blockbuster sequel ng Jurassic World ng karagdagang $60 million sa ikalawang linggo ng pagpapalabas nito sa mga sinehan sa North America, kaya mayroon na itong domestic total na $264.8 million.

Bumaba naman sa 10 porsiyento ang ikalawang linggong kita ng pelikula kumpara sa unang linggo, at sa kabuuan ay nakalikom na ng $932.4 million, at papalapit na sa $1 billion mark.

Gayunman, hindi lang dinosaurs ang kumuha ng atensiyon nitong nakaraang linggo. Humataw ang Incredibles 2, na ngayon ay nasa ikatlong linggo nito sa mga sinehan, sa kinitang $45.5 million, at mayroon nang domestic total na $439.7 million. Pasok din ito sa ikalawang puwesto. Lumagpas sa inaasahang bilang ng North American audiences ang nanood ng action thriller na Sicario: Day of the Soldado at Uncle Drew. Nasa ikatlong puwesto ang Sicario, na pinagbibidahan nina Josh Brolin at Benicio Del Toro at kumita ng $ 19 million. Iniulat na gumastos ang pelikula, distributed by Sony Pictures, ng $ 35-$ 40 million para mai- produce. Pumang-apat naman ang basketball comedy na Uncle Drew, na tinampukan nina NBA AllStars Kyrie Irving at Shaquille O’Neal.

Kasunod nito ang Indian film na Sanju, isang biopic tungkol sa Bollywood star na si Sanjay Dutt. Kumita ito ng nakagugulat na $2.6 million sa 356 screens lamang sa opening weekend nito. Ipinapalabas na rin ang Fred Rogers documentary na Won’t You

Be My Neighbor? sa 654 na screens, at nag-eexpand. Nadagdagan ang kita nito ng $2.3 million nitong nakaraang linggo.

Makalipas ang dalawang linggo ng $100 million plus movies, ay nagkaroon naman ng little blockbuster break para sa Ant-Man

and the Wasp, na nagsimulang ipalabas sa mga sinehan.