LEPTO SA 10 PANG BARANGAY
Nagdeklara na rin ng leptospirosis outbreak ang Department of Health (DoH) sa 10 pang barangay sa Metro Manila kahapon.
Ayon kay Health Secretary Francisco Duque III, mula sa dating 18 barangay ay umabot na sa 28 ang may leptospirosis outbreak ngayon sa Metro Manila, matapos na madagdag ang 10 pang barangay sa mga apektado ng outbreak.
Kabilang, aniya, rito ang dalawang barangay sa Caloocan City, na nakapagtala ng mahigit tatlong kaso ng leptospirosis, kabilang ang Barangay 176.
“’Yung mga barangay na naapektuhan ay nadagdagan pa. Mula 18, noong huli akong nagpahayag, ay nasa 28 na. Nadagdagan ng 10, at nadagdagan ng isang siyudad,” sinabi kahapon ni Duque sa panayam sa radyo.
Una nang nagdeklara ng leptospirosis ang DoH sa 18 barangay sa pitong lungsod sa Metro Manila, na kinabibilangan ng Quezon City, Taguig City, Pasig City, Parañaque City, Navotas City, Mandaluyong City, at Malabon City.
Sinabi pa ni Duque na kung bahain ang lugar ay tiyak na maraming tatamaan ng leptospirosis doon.
Ayon kay Duque, idinedeklara ang leptospirosis outbreak sa isang lugar kung ang mga naitalang kaso doon ay lampas na sa average na bilang ng mga kaso na naitala sa nakalipas na limang taon.
Muli ring hinikayat ng kalihim ang mga local government unit (LGU) na paigtingin ang kanilang pagsusumikap na masugpo ang leptospirosis, sa pamamagitan ng pagpapatupad ng rodent control at flood control; pagsasaayos ng mga drainage upang maiwasan ang pagkakaroon ng stagnant water; at istriktong pagpapatupad ng pangongolekta ng mga basura, na pinamamahayan ng daga.
Ang leptospirosis ay isang infectious disease na nakukuha mula sa Leptospira bacteria na mula sa ihi ng daga, at iba pang hayop.
Madalas na dinadapuan ng leptospirosis ang isang tao kung lumusong sa baha na kontaminado ng ihi ng daga, lalo na kung may sugat sa paa.
Maaari rin namang makuha ang naturang sakit kung malalagyan ng maruming tubig na may Leptospira bacteria ang mata at bibig.
Ilan sa sintomas ng sakit ang mataas na lagnat, pananakit ng ulo at kalamnan, pamumula ng mata, paninilaw ng balat, pagkukulay tsaa ng ihi, pagkaunti ng ihi, ubo, pagtatae, at pagsusuka.
Babala pa ni Duque, hindi dapat na mag-self medicate kung may leptospirosis, dahil antibiotics ang makalulunas dito. Hindi rin, aniya, dapat na ipagsawalangbahala ang mga sintomas ng sakit dahil ang leptospirosis ay maaaring magdulot ng kidney failure, brain damage, massive internal bleeding, at kamatayan, kung hindi maaagapan at malulunasan.
Sa datos ng DoH, 58 na sa mahigit 454 kaso ng leptospirosis mula Enero 1 hanggang Hulyo 5, 2018 ang nasawi.