6 inasunto sa onion smuggling
Anim na umano’y smuggler na responsable sa pagpupuslit ng multi-milyong halaga ng sibuyas at sigarilyo sa bansa ang kinasuhan ng Bureau of Customs (BoC).
Kabilang sa kinasuhan ay sina Joseph Martin Arriesgado, mayari ng EAJM Enterprises; Manilou Hernandez, may-ari ng Buensuceso Enterprise; at ang broker nito na si Lorenz Mangaliman; Arvin Tugadi, may-ari ng Epitome International Trading; Mark David Villanueva, may-ari ng Madrid Industrial Marketing; at ang broker nito na si Carme Ann Rollon.
Sina Arriesgado, Hernandez, Mangaliman at Tugadi ay kinasuhan sa Department of Justice (DoJ) dahil sa paglabag sa Section 1400 at Section 1401 ng Republic Act No. 10863 o Customization Modernization and Tariff Act (CMTA) na may kaugnayan sa Republic Act No. 10845 (AntiAgricultural Smuggling Act of 2016).
Habang sina Villanueva at Rollon ay kinasuhan naman ng paglabag sa Section 1401 at Section 1403 ng CMTA.
Binanggit ni BoC Commissioner Isidro Lapeña na sina Arriesgado, Hernandez, Mangaliman at Tugadi ay sangkot sa ilegal na pag-aangkat ng sibuyas, na nagkakahalaga ng P11,109,874.52, na dumating sa Manila International Container Port (MICP) nitong Abril.
Nag-ugat ang usapin nang magsagawa ng surprise spot checking sina Department of Agriculture (DA) Secretary Emmanuel Piñol at Lapeña sa 6x40 na mga container van na naunang idineklarang naglalaman ng mga mansanas.
Nang buksan, nadiskubreng mga sibuyas ang laman ng mga ito.
Sa kaso nina Villanueva at Rollon, natuklasang sila ang nasa likod ng pagaangkat at pagpupuslit ng sigarilyo na nagkakahalaga ng P26,650, 393.70 na nauna nang idineklarang mga industrial fur texture.