‘NPA member’ nangotong sa pulis
Isang lalaking umano’y nagpapakilalang miyembro ng New People’s Army (NPA) ang nadakip ng mga pulis sa isang entrapment operation matapos na ireklamo ng extortion ng isang pulis sa Sta. Elena, Marikina City, nitong Biyernes ng gabi.
Kinukumpirma pa ng mga tauhan ng Marikina City Police kung tunay ngang miyembro ng NPA si Lito Evangelista, 38 anyos.
Batay sa ulat ng Marikina Police sa tanggapan ni Senior Supt. Bernabe Balba, director ng Eastern Police District (EPD), nabatid na dakong 9:30 ng gabi nang maaresto ang suspek ng mga tauhan ng Police Community Precinct 7, sa pamumuno ni SPO4 Rowel Goral, batay sa reklamo ng kanilang kasamahan na si PO2 Alan Ambona.
Nauna rito, tinawagan at itinext umano ng suspek si PO2 Ambona, na nakatalaga sa PCP 7 ng Marikina City Police.
Nagpakilala umanong miyembro ng NPA ang suspek at hinihingian ng P3,000 ang biktima. Binantaan pa umano ng suspek si PO2 Ambona na papatayin at susunugin ang kanyang UV Express, kung hindi ipapadala sa kanya ang hinihinging pera sa pamamagitan ng Smart Padala.
Sa halip namang sumunod, inireklamo ng biktima sa kanyang mga kasamahan ang extortion activities at nagkasa ng isang entrapment operation.
Nagpadala ng P100 ang biktima sa suspek gamit ang account number na ibinigay ng suspek, na agad namang naberipika na nakarehistro sa Marikina Public Market, sa Sta. Elena, kaya natunton ng mga pulis ang suspek.
Tinawagan naman ng biktima ang teller na nagmamay-ari ng Smart Padala account number at kinutsaba na i-delay ang anumang transaksiyon na gagawin sa halagang kanyang ipinadala.
Nahaharap ang suspek sa mga kasong extortion at grave threat.