Ordinaryo na lang ang pagpatay sa PH?
SA nakalipas na linggo, dalawang alkalde ang napatay sa pamamagitan ng pagbaril at pananambang. Ang una ay si Tanauan City Mayor Antonio Halili na binaril at tinamaan sa puso ng isang sniper o marksman habang dumadalo sa flag-raising ceremony at umaawit ng “Bayang Magiliw” o “Bayang Hinirang”. Ang ikalawa ay si General Tinio (Nueva Ecija) Mayor Ferdinand Bote na tinambangan sa Cabanatuan City.
May nag-aakala tuloy na ang Pilipinas ay nagiging parang isang “Wild, Wild West” country. Isipin ninyo na tatlong paring Katoliko, 10 journalists, 12 local officials (kasama na rito sina Halili at Bote), mga prosecutor, abogado at libulibong suspected drug pushers, at users ang napatay sa nakalipas na dalawang taon. Parang ordinaryong pangyayari na lang daw yata ang pagpatay sa ating bansa. Itanong ninyo ito kay presidential spokesman Harry Roque at baka may maganda siyang kasagutan.
Habang isinusulat ko ito, may balitang magpupulong bukas (Lunes) sina Pangulong Rodrigo Roa Duterte (PRRD) at ang pangulo ng Catholic Bishops’ Conference of the Philippines ( CBCP) na si Davao Archbishop Romulo Valles sa Malacañang. Parehong taga-Davao ang Pangulo at ang arsobispo, at sinasabing magkaibigan pa.
Ayon kay Roque, parehong palabiro ang dalawa at malaki ang tsansa na sila ay magkasundo. Nangako si PRRD na tatahimik muna sa pagbatikos sa Simbahang Katoliko matapos niyang laitin ang kinikilalang Diyos ng mga Katoliko. Dapat daw magkaroon ng “verbal ceasefire” ang gobyerno at grupong relihiyoso habang idinaraos ang dayalogo ng Pangulo at ng arsobispo.
Samakatuwid, hindi muna magmumura si Mano Digong at bibirahin ang Simbahan samantalang titigil din sa pagbatikos ang mga pari at obispo laban sa administrasyong Duterte. Hintayin at obserbahan natin kung matutupad ito. Sana ay magtagumpay ang pag-uusap ng dalawa, alang-alang sa kabutihan ng Pilipinas na ngayon ay sangkaterba ang problema.
Samantala, itinanggi ng pamilya ni Mayor Halili na siya ay isang drug lord. “Hindi isang drug lord ang aking ama”, ayon kay Angeline Halili, anak ng alkalde. Ayon sa kanya, ang mga alegasyon na ang mayor ay isang drug lord ay pawang haka-haka at walang ebidensiya. “Si Pangulong Duterte ay binigyan ng maling impormasyon tungkol sa umano’y pagkakasangkot ng aking ama sa droga,” dagdag pa niya.
Itinanggi ni Harry Roque na sinabi niyang ang Simbahang Katoliko ay nakikipagsabuwatan sa mga komunista upang patalsikin si PRRD. Nilinaw niya na ang pahayag ay tungkol sa posibilidad na ilang miyembro ng Simbahan ang sumasama sa panawagan na patalsikin ang Pangulo. Bilang tugon, hinamon si Roque ni Manila Auxiliary Bishop Broderick Pabillo, chairman ng CBCP’s Commission on the Laity, na tukuyin ng presidential spokesman kung sinu-sino ang mga pari o obispo na kasapakat ng mga komunista.