Carless Monday sa city hall, inaprubahan

BAGUIO CITY– Simula sa ikaapat na Lunes ng Agosto at tuwing ikaapat na Lunes ng buwan, inaprubahan ng City Council ang pagsasagawa ng Carless Monday sa city hall para sa experimental basis bago ang pagpapatupad ng Carless Days sa iba pang pangunahing lansangan sa central business district area.

Ito ay upang matukoy ang pagsunod ng mga lokal na opisyal at empleyado sa environmental preservation and protection program bago palawakin ang sakop ng Carless Day sa iba pang lansangan sa iba’t ibang parte ng lungsod.

Nag-ugat ang mungkahing magsagawa ng Carless Monday sa panukalang ordinansa ni Councilor Elaine Sembrano na payagan ng magsagawa ng Carless Day sa lahat ng kalsada sa lungsod upang makatulong sa pagsisikap na mapangalagaan ang kapaligiran ng lungsod.

Tuwing Carless Monday, walang pribado at pampublikong sasakyan na paparada sa mga garahe ng city hall upang makaiwas sa polusyon.