Edukado, disiplinadong mga tanod sa Orani
ORANI, Bataan – Nais ng isang bagong halal na barangay chairman ng Orani, Bataan na armasan ng sapat na kaalaman at disiplina ang kanyang mga tanod upang mapagsilbihan nang maayos ang kanilang lugar.
Nakaagaw ng atensiyon ng mga mamamahayag ang nasabing panukala ni Barangay Mulawin Chairman Marvin Dela Cruz dahil ito ang unang pagkakataon na sasailalim sa special training ang mga tauhan ng barangay peacekeeping action team (BPAT).
Sinabi ni Dela Cruz na gusto niyang may sapat na kaalaman sa batas ang kanyang mga tanod sa pagtiyak sa seguridad ng Bgy. Mulawin, gaya ng mga pulis at iba pang nagpapatupad ng batas sa bansa.
Aniya, ang mga tanod ng Bgy. Mulawin ay sumailalim sa limang-araw na pagsasanay tungkol sa basics ng Anti-Violence Against Women and Children Act (Republic Act 9262), ng tungkulin ng Scene of the Crime Operation First Responders, ng Special Protection Against Child Abuse (RA 7610), ng Exploitation and Discrimination; ng Correspondence and Report Writing; ng Comprehensive Dangerous Drugs Act (RA 9165), at ng Barangay Drug Clearing Operations and Physical Conditioning.
Nabatid na kabilang sa mga nagsagawa ng pagsasanay sa mga tanod sina Balanga Police Chief, Supt. Byron Allatog; Scene of the Crime Operations (SOCO), Bataan Provincial Crime Laboratory chief, Chief Insp. Ailyn Perez; PO2 Reynaldo Viray; PO2 Jobelle Hugo; at SPO1 Francis Francisco.
Isang matagumpay at respetadong negosyante sa trucking at hauling industry, walang kalaban si Dela Cruz nang kumandidato nitong Mayo.