3 pa sa Abu Sayyaf, sumuko sa Basilan

ZAMBOANGA CITY - Sumuko sa militar ang tatlong miyembro ng Abu Sayyaf Group (ASG) sa Lamitan City sa Basilan, nitong Sabado.

Paliwanag ni Joint Task Force-Basilan (JTF-Basilan) commander Col. Fernando Reyeg, ang tatlong bandido ay sumuko sa 3rd Scout Ranger Battalion, na pinamumunuan ni Lt. Col. Montano Almodovar, dakong 6:00 ng umaga.

Isinagawa, aniya, ang pagsuko sa tulong na rin ng mga opisyal ng Akbar, Basilan na kinabibilangan nina Akbar Vice Mayor Ali Sali, Councilor Abdul Halik Yusop, Barangay Upper Sinangkapan Chairman Nuruddin Hasirin, at Basilan Provincial Board Member Faisal Salih.

Nag-o-operate aniya ng mga bandido sa pamumuno ng ASG sub-leader na si Masud Tanajalin, alyas “Abu Talha”, na napatay na ng militar, kamakailan.

Kabilang sa tatlo sina Samir Laarin, 33; Ramil Mobarak, 33; at Naim Majid, 31, ng Upper Sinangkapan, Akbar, Basilan.

Isinuko rin nila ang isang M16 armalite rifle, dalawang Garand rifle, at iba’t ibang bala ng baril.

Kabuuang 123 bandido na ang nagbalik-loob sa pamahalaan mula EneroHulyo ng taon.

“This is a result of our continuing close collaboration with the LGU officials to convince these ASGs to lay down their arms,” pagdidiin pa nito.